أخر أسطرة الحكايات كي الهواء وسط بدنك بعد أي شهيق لازم فمّا زفير و بعد أي زفير لازم فمّا شهيق و بعد ما توفا أي حكاية لازم فمّا بداية جديدة نخلقوها نبنيوها في الخيال و نردّوها حقيقة ,

كاينّو مكتوب علينا كل ما نوفاو من حاجة نبداو نستنّاو حاجة أخرى ديراكت يعرضك طريق و لازم تكمّل فيه .. في كل بداية فمّا حاجات تنجّم تضيعك تتوحّشها تتمنّاها ترجع و تعاود تصلّح فيها الغلط ولاّ إطّوّل في مدّتها تقول فيها كلام اشتهيت تقولو ولاّ ما تقول فيها شي و تشبع سكات تشبع تأمّل في إلّي فات ..

في كل بداية فمّا نفس جديد مبني عل القديم فمّا ريح يهز و ريح يجيب جبال واقفة تصارع و إنتي ضعيف و قوي طبيب روحك و دواها و في كل بداية فمّا حاجات ما تنجّمش تتلخّص في كلمات اليوم نكتبلك و نستعرفلك إلّي ما كنتش نحب نحكي معاك خاطر مش أي حد ينجّم يفهم كلامي و يكابر باش يوسّع بالو على تخرنيني و غشّي الضعيف قدّامك و مش أي واحد ما يضحكش على تخلويضي كان بمعزّة و مش أي واحد تنجّم تبقى تحكيلو و ما تندمش على كلامك معاه .. و إنتي الوحيد إلّي نستحقّو كي نتخنق نستحقّك في كل لحظة و كل دقيقة مستحقيتّك توّا و انا نكتب تمنّيتك قريب و بعيد أوّل واحد باش بقرا التاكست و يقلّي رايو بصراحة , و ليّا أيّامات في نصوصي نحكي مع العباد نتهرّب منّك و اليوم نحب نحكي معاك كلام ماكش باش تسمعو مش باش يوصلّك ...

يمكن إنتي زادة جدّت عليك حكاية (ما عنديش قلب ) فرحانة حتّى بلا بيك كيفك بالضّبط نضحك و نلعب و عندي ناس أنسب تعبير لعلاقتي بيهم معارف نوسّع في بالي معاهم و يتعدّا النهار حذاهم أما لا مش كيف القلب لداخل الدّنيا فيه شتاء و الحال فيه خريف , قاعدة نحاول نعيش كيما العباد ولاّ أقل شويّة مالعباد قاعدة نحاول نكون لاباس باش كي نتسأل على حالي ما نكذبش , فرحانة بضحكة بلاستيكيّة و شويّة كلام نقول فيه باش ما يضهرش الوحش على وجهي و ما يكثرش السّكات ويخوني الوقت . نضحك خاطر فمّا حاجات حلوّة مازالو ما تفسخوش و البداية الجديدة مازلت ما استانستش بيها كيما لازم و مضطرّة ما نظهّرش بالنّسبة ليّا يمكن تكون هاذي آخر كلاماتي ليك و باش نحكي حاجات عملتهم كي خنقني على خاطرك الوحش و مالقيتش كيفاه نقتلو و نرجع نواسيه عندك الحق كنت تقول علّيا مهبولة خاطر اليوم و كي ما لقيت حد ونّسني بعدك شريت دخّان كيما كنت نمشي معاك باش تشريه و ما تكيّفتش أما شعّلتو و خلّيتو في نارو يذوب تخنقت بريحتو سرحت معاه تذكّرت تفاصيلو عليك كيفاه وسط يديك تقتل فيه و هوّا يفرشلك في الموت على امد طويل (بعيد الشّر عليك) في وحشتك كاهو نحط الياسمين قدّامي و نستنّاه يذبل نخترعك في خيالي و نمدهولك نقلّك هذوما انا في حياتك ذبلت و ما بقا منّي كان شويّة حكايات يمثلو ريحتهم استحفظ عليهم , في وحشتك اكاهو تعلّمت نحسب النّجوم و نحكي معاهم نسمّيهم و نخبّيهم نلوّج على القمرة إلّي ورا الغيوم متخبية و ننسى إلّي إنتي كاهو قمرة حياتي فرحة عيني كيما كنت إنّاديك و في الوحشة ليك تعلّمت الوحدة إلّي علمتني نكتب عليك كدس كلام ما يملي الكتب و يفضّل و بعد نقطعو ولاّ نخبّيه , كلامي إلّي عمري لكل مستحفظة عليه كيما ولدي ليوما هان قدّامك ...

بمناسبة الحديث على الوحش أمّي ديما تقلّي " الوحش و لا الأذى" و بصراحة انا تعبت مالوحش ومالأذى .. الأذى علّمني الصّحبة لروحي و عرّفني إلّي انا نتسمّى ملايكة مقارنة ببرشا شواطن و نتسمّى ملايكة مدام الحب في قلبي مازال ليك و صامد , الأذى علّمني إلّي هوّا صاحب الوحش كل ما زادت وجيعتي على القدّام عرفت إلّي الوجيعة إلّي ضقتها منّك أخف على قلبي خاطرك إنتي وحدك الصّعيب و الحنين الدّم البارد و الغيرة إلّي تبان على العينين إنتي وحدك ما تحبّش القسمة ما تحبّش الخروج على الخط وحدك كلمة تغشّك و كلمة للفردوس الأعلى تهزّك و وحدك فهمت فيّا كل شي كان خوفي و غيرتي من حاجات هدمو إلّي بيناتنا ..

اليوم ناقف قدّام المرايا و نتخيلك حذايا تخزر لوجهي معايا نتبسّملك و نقلّك ريت كي قتلك ما تحبنيش و تتفكّر كي كنت نقولهالك تفد و تتغشّش تقلّي تعاودها نكرهك و على ساحتك ما تجبدنيش ليوم كرهتني على ما فمّا شي كرهتني وقت دافعت على روحي و وقت مت بالغزّول و قتلك لي بيناتنا وفا أخرج من حياتي طول طاوعتني اليوم في وسطك ثلج ينجّم يقتل و وسطي موت يحوّص على الإحساس وسطي دفنو مع حكايتنا , الموت خلّاه ليك ربطو بيك الحب لكل تسمّى عليك و خلافك كان أمّي سمعت منّي كلمة نحبّك رغم إلّي الحب ما يتلخّصش في الكلام أما نحبها كي تخرج من قلبك , اليوم كبِرت و كبِرت على الرّجوع للثنيّة لقديمة و إنّي نسامح العباد إلّي كانو سبب في بعدنا و اليوم وفا الهروب منّك وفا الكلام وفات الكتيبة و الكتيبة إلّي كِبْرت بيك و عليك كبِرت و كبرت الدّنيا كبر الكره وسطي كبرت الوحدة و مافمّا شي يستحق فمّا انا فمّا كلمة توحّشتك بتفاصيلك الصغيرة و غيرتك الزّايدة و حكاياتك المفقودين...

كبرت و لا نجّمت لا نقدّم لا نوخّر و لا نموت و لا نحيا حبّيتك أكثر مالمحبّة حبّيت نحكيلك على الوقت قدّاه صعيب اللّيل قدّاه يطوال و النّوم إلّي كان يسرقني منّك مالو إلاّ هنا على قربك و راحة اليوم فهمت إلّي حبّك ليّا كي يتعلّق بمصلحتك يولّي معقّد و فهمت إلّي إنتي تعوّدت تكتب و كي كتيبتك توصل للنُّص تتعقّد و توحل و تولّي نوع آخر تولّي لعب, خيال و هروب وبكلمتك مكتوب تولّي الدّنيا عندك لكلها لعبة حروف انا نكتب و وننقش و إنتي تجري على الرّبح في عوض ما تلم برشا قلوب , في حكايتنا انا نحبّك في عيني نخبّيك متوحشة نسمع صوتك كارهة العيشة بلا بيك و ضايعة في خيالك و إنتي وين ؟

حاسس بيّا ولاّ نسيت ما تلومش عليّا و تقول نسيت أنا ما نسيتش إنتي تناسيت إنتي هدّمت إلّي أنا بنيتو و علّيت إنتي إخترت طريق و هزنا للغريق كلّو مكتوب وصل لمرحلة و وفا ... و اليوم كبرت يمكن ظاهرة مرتاحة أما فمّا حاجات باقي مكتوبين عليك حاجات صغيرة نتوحّشهم و نتوحّش نعملهم و حاجات نحب الوقت يرجع باش من طريقي نبعّدهم و يبعد من ثنيّتنا الأذى أما حبّي أنا راو عمري ما نسيت مازلت قلبي ليك مهما مشاغل الدّنيا بعدتني عليك مازلت نستنّى فيك بداية للحكاية الجاية و نمثّل لي انا بلاش قلب أما حالتي تعبت و شاهية نقلّك إنتي المرّة هاذي أحكيلي حكاية