Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
يَا رَمْلَة
Amir Oueslati - أمير الوسلاتييَا رَمْلَة يَاللِّي غَارْڤَة شْوَيْ يَا رَمْلَة يَاللِّي ..
مَا نَعْطِي مِنِّي شَيْ .. خُوذْ كُلِّي
بَحْرِي جَنَّة وَاڤْدَة فِيهَا النَّارْ
وِ فْلاَيِكْ المُوجْ مْلاَيِكْ وِ فْنَارْ
يَا رَمْلَة يَاللِّكْ حَارْڤَة تِشْوِي يَا رَمْلَة يَاللِّكْ ..
مَا نَاخِذْ مِنِّكْ شَيْ .. نَاخِذْ كُلِّكْ
مَا نِحْلْمِكْشْ .. مَا تْجِي عَ الخَاطِرْ
اِنْتِ فِي مْنَامِي .. مْنَامِي
اِنْتِ فِي مْنَامِي تْنَامِي , وْ نِحْلِمْ بْأَحْلاَمِكْ
وِ اِنْتِ فِي صَحْوِي لِخْوَاطِرْ
اِنْتِ فِي صَحْوِي تَصْحِي , وِ نْهَتْرِي بِكْلاَمِكْ
وْ جَاهْ رَبِّي وْ رَبِّكْ , جَانِي جَانِكْ يِتْشَافْ
سَحِّتْ مْلاَيِكْتِي مِنْ فُوڨْ زُوزْ أَكْتَافْ
حَسْنَاتِي تْفَرْڤِتْ مْنِ كْتَابُو وْ حَسْنَاوَاتِي فِيكِي تَابُوا
عْلَى يِدِّكْ حْزَازَة تْغَلِّطْ شْوَافْ العَرَّافْ
زِيدْ عِينَهْ خُوسَة فِي الفَصْ
وْ خَدِّكْ بْدَالْ ڤْوَالْ التَڤَازَة وِ بْدَالْ لَكْفَافْ
نْزِيدَهْ بُوسَة لآخِرْ نْفَسْ
نْطِيرْ لآخِرْ حَدْ .. لِلحْوَافْ
فِينْ مَا فَمَّا حَدْ يْڤِدْ يِتْنَفِّسْ
وْ فِينْ مَا فَمَّا حَدْ بِخْلاَفْ ..
بِخْلاَفِكْ .. فِينِكْ
فِي هْفَافْ .. فِي كَافْ .. فَ اَغْوَارْ
فِينْنِي بِينِكْ وْ بِينِكْ
أنَا عَاكِفْ فْ غَارْ .. طَوَّافْ
مَا رَاتْ سِنْتِي الشَّمْسْ
كْبِرْتِ اِنْتِ مِ الجِنْ
وْ كْبِرْتْ أَنَا مِ الإِنْسْ
أمير الوسلاتي
Website Design Brisbane
Tags: