Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
نَا عاشڨْ
Amir Oueslati - أمير الوسلاتييا بْخَيِّتْهَا
حبّيتها هي و وْخَيِّتْهَا
اَاَشْبيها ؟؟
كان ف الشّْبِيهَة فما شْبيهَة
و كان ف العمر فما فرڨْ
غير نايا مش مْنَجِّمْ نْفَرِّڨْ
شايفْ مَنْجِمْ زِينْ في شفايفْ الدّلولة
و زين البنيَّة لُولَة في فُمها
خايفْ نزيد نحب اُمها
و عُوضْ نْضُمْ الصّبَايَا .. نْضُمْهَا
*
شايف عِينِينْ بُنْ
و خْدايِدْ لْبَنْ
و قهوة تِتِدّْمِنْ
مِدْرِي نُنصب خْطار وَالاَّ نختار بينهم بالتْڨَازَة
و مِدْرِي على مِنْهِي نْخَيِّرْ اللَّهْوَة
حتى التَّڨَّازَة حَايرة في القهوة
ڨد ما نترشّف الفنجان سْمِلاَّ جَانْ
لا بِيتْ مِنَّهْ نَشْبَعْ و نْكِفْ
و لا العِينِينْ بَاتْ تَنْشَحْ و تْجِفْ
و عُوضْ نِفْرِدْ كَفِّي .. نْلِمْهَا .
*
وَلِّيتْ بين هالْ الجَنَايِنْ جَنَّانْ خَادِمْ
وَلِّيتْ آدم تِغْوِينِي نَفْسْ اللَّفْعَة
نْذُوڨْ ضْرُورِةْ الغَلَّة و النَّفْعَة
نِتْغَرْ و نِتْكْوَا و نْعُودْ نَادِمْ
و الصَّفْعَة ما ڨَدِّتْ تكون دْوَا
و نايا ما ڨَدِّيت نِتْسْوَا
و عُوضْ نْبَرِّي نَفْسِي .. نْسِمْهَا
*
و كان نْغَلِّي دُوزِةْ لِهْبَالْ و نْعَلِّي المُوجَة
نْحِبْ بْڨِيِّةْ العِيلَة مِلْ وْخَيْ والبَّيْ و العزوزة لِلاَّ دُوجَة
و نجيب المِزْوِدْ و الطَّبَّالْ
من صغري ڨِلِّيلْ الجِيبْ و ڨَلِيلْ الحِيلَة و البالْ
كان نلڨَى نعرّس بالكُلْ في ليلة
و تِتْفْرِشْ النَّعْمَة و العُولَة
نا عاشڨْ ف البْنَيَّة لُولَة
و عَلْجَالْهَا نْوِدْ بْڨِيِّةْ نْسَاهَا و رْجَالْهَا
و نسامح كل خَطَّابْ جَالْهَا
و نبارِكْ لِلِّي وَلاَّلْهَا مُولَى
و عُوضْ نْفَسِّدْ فَرْحِتْهَا .. نْتِمْهَا .
*
نَا عاشڨْ في البْنَيَّة البِكْرْ
مِنْ حِينْهَا الڨْمَرْ صَايِرْ بَدِرْ
وَلِّيتْ طَايَعْ شرع المِلَّة
و زاير سيدي لُعْڨَابْ و لِلاَّ
حْلِفْتْ بِاليمِينْ مِتْعَشِّڨْهَا مهما صار
و حْلِفْتْ على مَيَّاتِي بِاللِّيسَارْ
وَلِّيتْ نْبَاتْ فِي مْڨامْ الوِلْيَة
و نَكفرهُم لوْ تجيني منهم بَلْيَة
و عُوضْ نِذِّنْ للصَّلاَة .. نْأِمْهَا .
*
عَنَّا فَرْحْ اللِّيلَة م الاَجْوارْ
ذْبَايَحْ من اِمَّالِيهْ لِلزُّوَّارْ
و مُولاَة العُرْسْ بالحُولِي دَايْرَة
خَشِّتْ بابْ لِمڨَام زَايْرَة
مْوَالِينْهَا الشَّاطْحَة و البَاطْحَة
و ڨبل ما تڨرا الفَاتْحَة
تِحْدِفْ الجَاوِي في المِجْمَارَة
نَزْعِتْ الفُولاَرَة على وِجْهْ ڨْمَرْ صَايِرْ بَدِرْ
شْطَرْ الفُولَة , اَاَضَا فَرْحْ لِبْنَيَّة لُولَة , و عُوضْ ...
أمير الوسلاتي
Website Design Brisbane
Tags: