يَا سَادَة وْ يَا مَادَة وْ الله لا يَقْطْعِلْنا عادَة ..

يِحْكو على غرَابْ مُجْرابْ , سُلْطانْ على طَبِّةْ تْرَابْ , يُظْلِمْ الأَعْرَابْ وِ الأَغْرابْ , وِ الغِربانْ أَسْرابْ أسرابْ .. تْنَاشِدْ سِيدي لِغْرَابْ

خَرْجِتْ تَسْريبة , إنو ثمَّا ثورة ڨْريبة , لِغْرابْ بادي عليه الرِّيبة , الظالِمْ يَدْفَعْ ضَرِيبة , و العْرِيبة عَمْلِتْ إضرابْ

تْلَمِّتْ لِهْوَايِشْ فِي الغَابَة , وِ المْوَاشِي جُو غْضَابَة , الكَمْشَة وَلِّتْ حْضَابَة , شَدُّو وَاشِي مِ العِصَابَة .. بَانِي شُعْبَة فِي مِحْرَابْ

هَرْبُو بِصْيَاغَة جُورِيَّة , خَرْجِتْ مِ الحَبْسْ حُورِيَّة , تْعُومْ فِي بْحَرْ الحُرِّيَّة , لْيُومْ تْحَرّرِتْ البَرِّيَّة .. مِنْ اِنْفْلِوَنْزِةْ الأَجْرَابْ

السُّلطان لازم شَايِبْ , خِبرة حتى كانو عَايِبْ , نَابْتَة فِي ظَهْرُو لِحْدَايِبْ , يْڨُودْ مِيتِينْ نَايِبْ .. تَايِبْ يْبِيعْ فِي الشّْرَابْ

قبل الهِجرة ميلادو , بالتقسيط فرّڨْ بلادو , ڨْسِمْها وَرْثَة بين أولادو , لِمعَارِضْ ڨِتلو جَلاَّدو .. الثَّرْوَة أَوْلَى لِلڨْرابْ  

غْلاتْ أسوامْ الأعلافْ , تْعَدُّو 7 سنينْ جفافْ , يُشْرِبْ لي عَندو الأكتافْ , جُغْمة جُغْمة بالمُغْرَافْ .. وِ البَكْمَة تَرْوَى سْرَابْ

عْوَى الحَيْوَانْ وِ عْوِيتْ , عَلِّلي رْبِحْ بِالتَّصْوِيتْ , وْزِيرُو جَايْ لِلزِّيرُو وِيتْ , وِ العْصَافِرْ وِيتْ وِيتْ .. تْلَحِّسْ فْ غَابَة خْرَابْ

ڨَالو زْيَارَة فُجْعِيَّة , لِبْسُو لِلزَّايِرْ بِدْعِيَّة , ذَبْحُو مِعْزَة وْ بَعَيَّة , ضْحِيَّة بِفْلًوسْ الرَّعِيَّة .. صَحَّة لْبَابَا العَرَّابْ

جابو مْطرْڨَة وْ زِنْزِيرْ , قبَلْ ما يوصِلْ الوَزِيرْ , زِفْتْ الوَادْ وَلَّى غْزِيرْ , عَمْلُو حَفْلَة وْ فَوَازِيرْ .. نَاقِصْ كَانْ يْغَنُّو رَابْ

تْصَلْحِتْ الوَاجْهَة وِ العَلَمْ , رِيحِةْ الدُّهْنْ تِتْشَمْ , لِوْسَخْ  لْكُلُّو تْلَمْ , حُطْ ثَمْ تَلْڨَى ثَمْ ..  سْنَاسِةْ نُوفَمْبِرْ بِالتُّجْرَابْ

ڨَالْ دِمْنَة لْكَلِيلَة , الثَّرْوَة تْبَانْ قبَلْ بْلِيلَة , الثَّوْرَة بَايْنِتْهَا ذْلِيلَة , لِكْلاَبْ نَسْلْ وِ سْلِيلَة .. وِ البِنْدِيرْ جِلْدُو طَابْ

بِيعَة فِي سُوڨْ نْخَاسَة , قَوَّادَة تْصُبْ بالعَسَّاسَة  , الله لا يقطع سْنَاسَة , بِطْبِيعِتْهَا الحَيْوَانَاتْ لَحَّاسَة .. تْنَاشِدْ سِيدِي لِغْرَابْ