و نحب ‭‭‭‭‭‭‭‭‭‭‭‭‭‭‭‭‭100‬‬‬‬‬‬‬‬‬‬‬‬‬‬‬‬‬حاجة فيك ،صحة رقعتك و قلبك و هبالك الي مواتيك

ڨحرة عينيك و تذبيلة شفرتك و حمرة خدك و لمسة يديك

نحبك انت و انت الي متركن و انت الي مخبي فيك ،نحبك انت كيف تكون زاهي و انت مغشش و انت  باهت و خافي

و نحب ‭‭‭‭‭‭‭‭‭‭‭‭‭‭‭‭100‬‬‬‬‬‬‬‬‬‬‬‬‬‬‬‬حاجة فيك ،أحلامك الي سبقاتك و صوتك كيف تبدى تدندن و تغني يا ليلي يا عين ،نحب غرامك و حروفك و أقلامك ،نحبك

و نحب ‭‭‭‭‭‭‭‭‭‭‭‭‭‭‭‭100‬‬‬‬‬‬‬‬‬‬‬‬‬‬‬‬حاجة فيك ،غزرتك  و نغرتك و شرارة الي تڨدي من عينيك ،غيرتك على البلاد و لومك عالعباد و حقدك عالإستبداد ،نحب فنك و الوشمة الي مزينة بدنك

و نحب ‭‭‭‭‭‭‭‭‭‭‭‭‭‭‭‭100‬‬‬‬‬‬‬‬‬‬‬‬‬‬‬‬حاجة فيك ،حكاياتك و دمعتك و سكاتك ،هزة عينك فيا و تعنيڨة قلبك ليا ، و عمايلك الي متوفاش ،

و نحب ‭‭‭‭‭‭‭‭‭‭‭‭‭‭‭‭100‬‬‬‬‬‬‬‬‬‬‬‬‬‬‬‬حاجة فيك ،شطيحك في الشارع و كوفيتك الي تعارك في الدنيا و تفارع ،نحب كلامك الي شطرو ضايع و تبسيمتك المغدورة و المليانة مواجع ،و اسأل بلاصة العادة على حديثنا و تعنقيتك الي على غرادة ،باب بحر و المدينة العربي و شارع المحبة و نهج المطر ،اسأل كرتوش البوليسية و سبهم و المتراك و الباندية كلهم شاهدين عليا و عليك ،شاهدين على حبي ليك

و على حبي ل ‭‭‭‭‭‭‭‭‭‭‭‭‭‭‭‭100‬‬‬‬‬‬‬‬‬‬‬‬‬‬‬‬حاجة فيك ،عنادك و صحة راسك و خنارك ،أصلك و فصلك و كاس خمرتك ،

نحب روحك الباردة و أحلامك الشاردة و ريحة رواياتك الي من قاع الخابية ،نحب حديثك و حزنك و تتليفك ،نحبك بكلك بعيوبك و بخرمك

و نحب ‭‭‭‭‭‭‭‭‭‭‭‭‭‭‭‭100‬‬‬‬‬‬‬‬‬‬‬‬‬‬‬‬حاجة فيك و كل تفصيلة  كل شبر منك و كل حاجة خايبة فيك 

و نحب ‭‭‭‭‭‭‭‭‭‭‭‭‭‭‭‭100‬‬‬‬‬‬‬‬‬‬‬‬‬‬‬‬حاجة فيك قوتك و ضعفك و كل حاجة متعجبنيش فيك .