زعمة نتكلم والا نسكت،والانصيح بصوت عالي ،زعمة كان نتكلم ونكتب على الزوالي المقهور ،والمريض المغبون،والمظلوم الي يعاني ،

زعمة كان نتكلم ونقول الي في قلبي وقلبك

وفي قلوب برشااا ناس عندها وجيعة كبيرة

وكرامتها خلاتها تخبي الدمعة قدام الناس

زعمة كيف نحكي على زيادة الأسعار الي خلات برشااا ديار

قاعدة تطيح وتسوس ..

زعمة كيف نصيح بأعلى صوتي ونقول يا دولة سرقتينا وجوعتينا والي يتكلم بالمتراك تعطينا

برشا ناس في قلوبهم غبينة فما ناس كيف تجي  تتعشاء

متلقاش. .واذا مرض صغيرهم ميلقا ش

لكن حيوطهم تغطي في فقرهم وقهرهم

والبوليس يكتم اصواتهم

زعمة كان تطلع لشارع وتقول يا رئيسنا يا باهي

نقص في الأسعار...

خلينا نعيشو معاك يا رئيسنا يا باهي

انت كول الكفيار

واحنا ناكلو حتى الشكشوكة

ههههههه حتى هذي مخلطناش عليها

والحارة عظم ب950

وووه يا زوالي رد بالك وحل عينيك

الدولة قاعدة تخدم فيك

تشعلك في النار وتزيد في الأسعار

باش تزيد تجوع

وصوتك يولي مقموع

باش بدنك يرخ

وتضعف وتولي مريض بالأمراض الكل

وبعد يطيشوك في السبيطار

تتعدالك جرثومة

والا زريقة غالطة

وعادي ينساو فاصمة والا مقص

وهكاكة تموت وانت مغبون

وسكاتك مش مسموع

والرئيس يطلع يخطب

ويقول هذا خارج عن ارادتي

ياخي قلتلكم انتخبوني

الله غالب انتم حمير

وانا راجل كبير...

وبرا عيش بنتي اعمل فركة صابون واسكت

خير ما ترصيلك في القرجاني تاكل في المناني