Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

حتى انا نسيت إسمي

reflexions-solitairesسُونيا الحري - Sonia Horry


برشا كلام واحل في حلقي

والتهنيدة زادت كبرت

والعمر يجري بينا

الي إتعدا أكثر من الجاي يمكن ،

الحلمة كبيرة والدنيا محلاها

كيف تزهينا،ومخيبها كيف تبكينا

وفي لحظة انشوف الدنيا

تتلحف بلحاف غليظ

تمشي تهرب علينا ،وتخلينا ضاعين هايمين

هاربين من أوجعنا البليدة ،

أقرب وأسمع

كيفاش ضلوعي قاعدة تتكسر ،

وحتى قلبي كيف يدق

كأنوا قاعد يذوب كيف الشمعة

برشا حاجات متعجبنيش ،ومنحبهاش

لكن يلزمني إنقول باهي ،يلزمني نضحك قدام الناس ، قدام المجتمع يلزمك إتكون قوي،ايه نعم يلزمك إتكون أسد باش متاكلكش الذيوبة

هكا إتقول أمي وجدتي والناس الكل .

برشا حاجات انرى فيها معوجة

نكرهها نتمنى إنبدلها

زعمة موش كان بدلت حياتي خير

خير من الجري وراء الاخرين

خلي الرئيس راقد في جبناتوا

وخلي الحكومة تقرأ في الفاتحة
ليل نهار أش دخلني أنا

خليهم يسرقوا البلاد

ويزيدوا فيها فساد

علاش إتخمم في البلاد
حرقك عليها الحليب

والا اتحب تاخوا بلاصة كيفهم

وكرسي مرصع بالذهب.

بالله أخطاني وفك عليا

أنا طبيعتي ننسى همي

وكل الي جرالي

ومازال باش يجري فيا

لكن عمري ما إنسلم ونسكت كيف إنشوف بلادي قاعدة إتضيع

وماشية للمجهول وشباب ضايع

وناس قتلها الجوع ،

الفقير غارق في فقروا للكرومة والحكومة غارقة في العسل

الزوالي معادش خالط كبدتوا تحرقت

يقري في صغاروا بالدموع

وكان خلط على فم عشاء يتقيد

باشا في زمانوا

ومتحكيش علي غدروا زمانوا

وتوسد الحيط وتغطى بالسماء

اه يا بلادي قداش وجيعة

وقت انرى الناس تحت الحيط

لا بيت يلمهم ولا صدر حنين

وصغار كيف الورد عايشين متشردين

الجوع والوسخ والهم والاستغلال

يا تونس قد ما نحنا إنحبوك

قد ما إلي حكموك ذلونا

وعفسوا علينا

ورد بالك إتسب والا تتكلم

غدوة يشدوك

يوكلوك ويشبعوك

وحتي إسمك ينسوك

لست شاعرة

حتى انا نسيت إسمي

سُونيا الحري
حتى انا نسيت إسمي