صحبتنا كانت صحبة غير ربع كنت مانيش فاهم ياخي احنا مع بعضنا و لا ياخي انت متاعي انا اكهو و لا انت متاع الناس الكل ياخي الكلام الي كنت تقولهولي كان ليلي ولا سمعوه برشا عباد لين ولا كيف الديسكي المجروح

زعمى انا و انت نفس الاحساس نفس المخ ساعات نحسك قريبتلي برشا نحسك متخبية الداخل في قلبي و بين عينية و سعات نحسك بعيدة بعد السماء والأرض نشوف فيك ضبابة اما انا كنت فاهمك كنت قاريك قراية كنت نحس بيك من هاكم العنين الذابلين و من هاكي الضحكة الباردة الي مخبية برشا وجيعة و برشا كلام

كنت نشوف فيك قوية كيف ما هاكي الوردة الي يحب يقلعها الريح اما هي ما خلاتوش قعدت شادى روحها   بالرغم الي انا كنت مانيش فاهم شئ من صحبتنا تعلقت بيك برشا وليت انتي هاكي الشمعة الي ضواتلي ليالية مبعد ظلمة طويلة ديما نحكيو و حكايتنا ما توفاش لين جاء هاكا النهار الي كنت قاريلوا حساب و تشربكت الامور و الي بنيناه في شهور طاح في رمشت عين كل شئ بالمكتوب