قالوا لبعيد عالعين بعيد عالقلب... و قلت البعد ما يفرق لحباب و ما يطفي حب...قالوا متفرهد و الخير عليه يصب و غدوة في ليام غيرك يحب..و قلت اللي بينا عمرو ما يضيع و الدنيا عمرها ما تخلي شكون فيها تعب...

زعما الليل يضواش..و ليام تجري و المر يحلاش....زعما الدنيا تدور وبعد السهر و الحزن و البكا يجيني النور ؟

قلت صبري على روحي و لا صبر الناس عليا ..نداوي جروحي بروحي و لا من داري عليا..و خلي الناس تحكي فيك و فيا ..نعرف مهما الليل طال و مهما دمعي سال ..ترجع ليا يا نور عينيا..

ليوم لعشية..مديت ورقة قلت نكتبلك شوية..قلت نكتب عالحزن ..عالحرقة ..عالوحشة لي فيا...قلت نكتبلك بالك ناري تطفى.. بالك حزني يخفى.. بالك تحن و ترجع ليا..

قلبت الورقة ..قلت نكتبلك كلام.. بريش النعام..كلام منقول من منام...نكتبلك على طيور النورس و ورد النعمان..عالبحر عالشجر..عالتفاح و عالرمان. يزيك ماللأحزان ..

قلت يزيك مالجمرة..خلي نحكيلك عالصيف و القمرة..بالك السنين تتعدى في غمضة عين..و ترجع و ننسى الغصرة..