يقولوا إلّي يتبع الحمام الجالي يروّح للمغاغر..و الي يتبع الغراب يهزو لربوع الخراب...

ما توالف الناس الي عليك تتآمر.. و ما تضحك في وجه الكذاب..

و يقولو الحنضلة ما تولي تفاحة و الخرشي ما تبان فيه ملاحة...

العمر طويل ..و الي ينسى اليوم خيرك ..غدوة يموت منسي بجراحه..

الناس أجناس.. فما الباهي و فما الي خيابتو لا تتعد و لا تتقاس..

فما الي يعنق و يبوس ..و وراك يلسع كالناموس يحُوس..عليك يدوس..يبيعك بطرف فلوس..

و فما الي في وحدتو تواسيه.. تمسحلو دمعة خديه.. ما تخليه..للخير تهزو بيديك .. للشر يرميك بيديه..

و فما الحسود ربي يعافي..في عينيه لهيب صافي.. يشوف عليك ذرة خير، يتمناك حزين تصير..

و فما الي بالجوع عينيه تلمع..فيك يطمع..و بمال الدنيا ما يقنع..

و فما الصاحب و فما الخايب.. و فما الصادق و فما الكاذب ..  و فما المتربي و فما الي قلبو بالشر معبي..  وفما الي مخو كبير و فما الي تحكي معاه تحير ..

و كيما يقولوا ..ناس تلقاهم سلعة ذهب و ناس ذوق حطب.. ناس تتعاشر و تتحب و ناس رد بالك تعطيها الجنب ..