ربي يعرف ڨداش حاولت ، ڨداش دفنت الف احساس و كلمة ، لونت الف موقف و لحظة ، باش نصنع الضحكة و نخبي الدمعة ، ربي يعرف ياسر لي موجودك فيا مكمّل مشروط ، ضرورة قصوة ، آخر الحلول الممكنة و أول اسهل طريقة للإنتحار ..

حبيت ياسر مرات نموت باش ننقذني من الدنيا ، باش ننقذ برشا ڨلوب مني ، حبيت برشا مرات نموت من ذاكرة الجميع و نوصلي حلمة و فقت منها و انت ناسيها  ، برشا مرات خططت كيفاش آخر لقاء ليا معاك ، كيفاش باش نرتب كلام يليق بحجم الجريمة .. لكني مالقيتش طريقة اخف ضرر لينا نحن الزوز الا اني نكون معاك ، خيرت ننتحر بعيشتي معاك ، ندفن روحي في الحياة الي يحبوها آخرين ..

حبيت برشا مرات نبكيك و ننزعك و نڨتلك مرة وحدة ، خير ببرشا من عذابك بيا و صبرك عليا ، حبيتك تموت موت نهائي  رحيم جدا ابرك من السرير البارد الي باش ترڨد فيه طول حياتك و ارحم من الغزرة البيضة الي باش تشوفها برشا ..

حبيت برشا نڨتلك انا وحدي باش ربي يعطيني عليك ثواب اني رحمتك مني ، ازين برشا من وجهي الاصفر المحوق بالسهر وقت نومك و احن برشا من يدي الجامدة ..

حبيت ياسر نوصلك رسائل و دعاء و بكاء و نداء و رجاء " ربي سبحانك انقذني" .. حبيتك تتنقذ مني ، اما حسرة عليا و على ايامي ماعرفتش نتكلم و ماعرفتش نكتب ، ماعرفتش نبداك انت كلك حب عيونك زوز ڨلوب و ڨلب مأوى و حضنك حماية ، شنعملك كيف انتَ كامل الأوصاف و انا ااخلل ؟ شنعملك كي انت حياتك مرتبة و ناقصتها بلاصة جت قياسي ؟ شنوة عندي نعملك و انتَ البطل المثالي و انا العاقة المتهورة ، الطايشة مطيشة في كل واد و مسرب ، شنعملك يا شوك على ظهري و انتـَ وردة .. ماطلتكش ماوصلني منك غير شوكك ، لسعتني و ماخلطلكش ، شنوة انا عملتو باش ربي يكافيني بيك ؟ اذا حقا انا سواد و انت بياض الثلج ؟

حبيت ياسر نشرحلك صدرك و نقص عليك عبأ و نفسرلك ڨداكش من قياس روحي من داخل ، ثمة حاجة ناقصة خلات البلاصة مش مرتاحة .. حبيت عالآخر ننقذك و ديما نڨلك امشي شوف روحك فالمرايا و انت مُـصر تبقى ترا في روحك فيا في وجهي في حياتي ، حياتي الي انا اصلا موش شايفتها ب سبب وجودك المسموح بيه و الغير مرغوب فيه ..

خاطر مش من صنعتي ، ماعرفتش نقراك ، كوداتك صعاب و الا علاش الكذب انت راجل بلاش كود ، انت فارغ من كل مافيا و مليان بـ وجايع م الدنيا و ناسها و جاي ليا نداويك ؟

ماكش فاهم لتوة اليّ انتَ ادراسك غالط و بعد ماطنبشت و لبست و ڨعدت ، نحب نسأل ، شنوة شفت في عيوني ؟ العيون فضيحة و انت حتى انك مافهمتهاش ، اصلا ماغزرلتهاش. الا للنقاش .. شنوة حسيت من لمستي الي تقريب ماجربتهاش ؟ كيفاش جاك صوتي و انا نحكي معاك في الرسميات لا غير؟

شنوة شفت فيا ليك ؟ ان شدك و اقنعك اني انا نعنيك ؟

حبيت برشا مرات ننقذك مني و نڨلك الي ماخبيتوش و ديما كان في وجهي ، حبيت ياسر مرات نخليك تسمع و تشوف ، لكن ما باليد حيلة ، "الحب أعمى" و سمحني آش محببك فيا ؟ شنوة فيا مثلا خلاك تحبني و تتمسك بيا ؟ ..

مريض ؟ انا زادة كيف الجميع مريضة لكن الشيء الوحيد الي متعبني إني ماعرفتش نرحمك و نڨلك أنا الدواء الغالط ليك ، أنا دواء ليك انتَ غالط يعذبك ما يڨتلكش ..

____