- قبل ما تقُول نحِبك جربْ قُولِلها كِيفاه عدِيتْ نهاركْ،  شنُو أخباركْ ، مرتاحَة و لا مبحَاحة، كليتْ و تِمْلِيتْ و لا كالعَادة تعبيِتْ و زدْت ضعُفتْ و تسَّلِيتْ. .

أحكِيلها على روُحك كِيما مَا حْكيتْ لحدْ ، دخَلها فِي وسط حلمتِكْ و فرحتِكْ ، وراهَا طابع ضحكتكْ و ذَوقْها مطعم دمعتكْ بشْ تحِسْ و تجِسْ، تِطمانْ و تستْكَانْ ، تودِكْ و تخبيكْ و يولِي مَا كيفك حَدْ و تفُوت كل حَد ..

- نْحبِك يا مزْيَانَة خاطر تُوثَق بيَّا و تخَرجْ الزِين الي فياَ ، تستنَانِي كِي نغيبْ و علَى وعودِي ما تشيبْ ، تحبنِي بالباهِي الي فيّا و العيبْ الي مالِي جْواجِياَ ..

أما وينكْ توّ ،  هانِي هناَ و انتِ معادشْ تلوجْ ع الهَناء ..

أرضِكْ و عرضِكْ ، قلمكْ و تُخمَامكْ ، زينكْ و ستيلكْ و معَاهُمْ هباَلِكْ  تخبَاو عليَّ و معادشْ يحِبوُ ع الطفل الصغيرْ الي فيَّا ..

أخطاكْ من هذَا الكُل ..

نحبكْ قُلتها وقتْ قلَق،  مشَى في بَاليِ الِي انتِ  لا تحِبْ و لَا تِتْحَبْ و الاَ  جيست تع شداَن يدْ ..

عارفْ الِي أنتِ تعْ الوقتْ الكلْ ، و حياَتكْ تحِبْ تزينَها بالفُلْ ، العَادِي و النُورمَال ما تحبُوشْ و الِي كيفِي تبعدْ علِيه و ما تُقربلُوشْ و كِي تحكِي معَاه ما تضوِيلُوشْ ..

يكفِي انكْ ديمَا تِتْحَبْ و تُقعد ديما في قلبِي ما كيفكْ حد ْ..

نحبكْ خاطر تقدِسْ الحُب و معاكْ الأيَام تمُرْ و تنسَى ديمَا المُرْ خاطرْ الي كيفك ما يجِي كَان مرة في العمُرْ .