الدنيا قداش تضحك..

البارح حمزة مات واليوم الشايب رجعت فيه الروح..

البارح سمية ضربتها كرهبة حتى نتيجة باكها معرفتهاش، وجارتها العجوزة اليوم قامت من الكوما..

البارح مهاب كان يتهاب اما جات سكتة قلبية خلات يسكت لنهار منعرفوهش وقتاه، واكا جارهم الوحداني رجع يتكلم بعد ما فقد فيه الطب الأمل..

البارح بية وسلمى كانوا يشطحوا والضحكة في فمهم منا لينا حتى لين دخل عليهم هو واغتصبهم وسكتهم بمخدة حرير، وهو اليوم يشق في فطر على البحر بعد ما نوى الصيام وتسحر البارح

قبل الآذان..

البارح، تقولش عليه ولت البارح، وتقلش عليه اليوم، وشيء ماهو بش يتبدل على غدوة.. البارح كانوا يضحكوا ويغنوا وكلهم أمل وبالمستقبل يحلموا.. وجاهم غدوة وضحك عليهم وعلينا ودوح

راسوا وهزهم معاهم..

البارح كانوا مرضى وفي تركينة محبوسين واليوم قاموا يمشوا وتولدوا من جديد..

وحود خذالهم من عمرهم في طرفة عين واخرين زادلهم في عمرهم لين تطفى العين..

البارح كان زوالي والكل مطفينوا واليوم ربح في دليلك ملك ولا لبرشا ناس اهم من الملك، ولاخر كان عايش بينهم كي الملك اما مات وتنسى واليوم لازم الخدمة تمشي..

الكلهم يغيضوا اما قد مايعيشوا اقل قد ما يغيضوا اكثر..

هذيكة الدنيا ديما تضحك علينا والي يعجب فيها تحبنا نضحكوا معاها..

الدنيا قداش تضحك..