Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
برائتي مشات
Sihem Hannachi - سهام الحناشيسامحني أمي غلطت...
كيف حلمت...
حلمة كبيرة،أكبر مني...
سامحني نسيت الدنيا، دنيتي وحدي صنعت...
مشى في بالي هدرة كبيرة، نعيش على كيفي، على إيقاع فنّي...
سامحني أمي...
لوّنت الحيوط و زيّنت...
حبيّيت الغشاشر و علّمت...
سامحني أمي...
ربيتهم كيفما إنت ربيتني...
سامحني على كل صباح خزرت في تصويرتي...
و قلت أنا نجّم و عمري ما نجّمت...
قلت عمري ما نسلّم و سلّمت...
سامحني أمي..
تعبت و ساقايا حفات...
و أنا نجري ورا حلمة خذات مني أكثر ماللي عطات...
سامحني أمي..
خاطر الضحكة اللي فيا زرعتها طفات...
غِلْبِتها الدمعة، و غلبتني و عليا طغات...
سامحني أمي...
عينيا خانوني... بكّوني...
اللي كانت فيهم لمعة، بالجمر حرقوني...
سامحني أمي...
تبدّلت...
ذبلت...
سامحني أمي...
ما نستاهلش عمرك اللي عليا ضاع...
و ذهبك اللي على خاطري تباع...
سامحني أمي...
برائتي مشات...
و الطفلة الصغيرة تخبّات...
في بالي غمّيضة و باش ترجع تطلّ..
ياخي مشات، هزّت قلبي، خلاّت العقل...
و العقل متعّبني يامّي، بكلّو حسابات...
مش مخلّيني نحس،نحب،نتوحّش،زاد قتل فيا اللي أصلا مات...
سامحني أمي...
يديا باردين...
و اللقة اللي كانت تمحات مالعينين...
و الضحكة اللي كنت تعشقها ماعادش بالرنّة...
و لات فوق مالقلب، باش كيف تراها تتهنّى...
سهام الحناشي
Website Design Brisbane
Tags: