و  خلّيناهم يستناو  فالشّرع  و  الحلال  و  الحرام  في  محطة  قريبة  مالموت.

و  اخترنا  نعرسو من  غير  منصححّو  حتى  ورقة  و  لا  فاتورة  فيها بقداش تاخوني  و  كأن فديت  قداش  يعطوك  فيا.

و  مهْري  شفّة بنينة.

و  موش  العدُول اما الڨمرة  كانت  شاهدة  علينا..

و سرْبينا  الضحكة في  طبق في  عوض  الشروبو  و  صحة  الرّقعة في  عوض الغريْبة.

و  لا  عرس  و  لا وطيّة هزينا كاسات جورج و  ركشنا في  شوارع المدينة و  عملنا  حفلة  مع  القطاطس  و  عم  الهادي إلى  يبيع  فالكتب آخر النهج.

و رقدنا  و  قمنا  و  لا  فرحت  بالدّم  و  لا  تحت  صدري  عملتلك بالحرقوص  وْشم..

و  لا  الفرش  ابيض  و  لبست  طرف  قماش  و  عملت  روحي حاشمة  و  لا  ضرب  المڨرون و  انا  لدويرتي  داخلة.

لا  حنّيت و  لا  صبغت  شعري  و  لا  نقيت..

و  لا  شهرين  ناكل  و نرُم  عدّيت.

و  لا  جهّزت  لا الدبش الدخلاني كدّست.

جيتك  كيف  ما  انا.

الشعر مشعشط.

العيون  محوقة  في  حالة.

و كرشي دازّة  على قدام.

و  راسي  مزنزن  عالدخان.

و  أنت  لا  جيتني  بخاتم  و  مڨياس.

و  لا  فيلا  في  حي  نصصر  و  لا  مارسيديس.

و  لا  راقد  على  ملاين و  لا  وعدتني  بتركيا  و  لا  صياغة  بعد  ما  تكمل  تخلص  الكريدي.

و  قرينا  الفاتحة  وحدنا.

و  فرشنا  ملحفة  شريناها  مالفريب..

و  خترنا  دار تطل  على  جنينة  البساج..

وين اول  تعنيقة قدام  الشرطة  و وين  اول  عركة ..

جبت  الكتب  إلى  عندي..

و  أنت  جبت  اوراقك  و حروفك  و  جيت.

و شعلتلي  شمعة  خذيتها  مالعطار.

و  طيبنا  مقرونة كذابة سفراتة.

و الماء  ماء  سبّالة.

و  تعشينا  و  تهنينا..

من  قتلي  نحب نعيش  معاك.

و  انا  جاوبتك  هاني  معاك.

و  قتلى نحب نسكن  فيك.

و  جاوبتك  انا  دارك  انا  حاميك.

و  قتلى نحب  نموت  و  نفني  فيك.

و  جاوبتك  انت  متاعي  و  انا  ليك.

و  نسينا  الحلال  و  حبينا  الحرام.

و  واساتنا  الڨمرة.

و تلهينا  فالغمرة.

و  بنّة  الثمرة.

و أنت الحُب.

و  انا  السّمرا..

و  عفست  و  تكويت..

احيتتت..

كواتني  الجمرة.

و  محلاها جمرة.

و رسمتلي قلوب في  كتفي.

و  أنت  ترسم  و  انا  نطلع..  كالصغار  فالمكتب.

لين  جات  نحبك..

و  أنت  كملت  ال 'ك' و  لقيت  روحك  عالحرف  متكي  ناكل  فيك..

جُعت.

و  أنت البُبّو  و  منّك  الشْبع  نخلق.

نعشق الرب  إلى  صنعك.

و  العالم التاج  إلى  نزينو  فوق  الراس..

و  أنت صاحبي قبل  الناس

و  أنت العشير..

و فالليل ترجع  بين  يديا  غشّير

و كأن صُدمو علينا و ما  صدقوش الي نحنا معرسين. .

و  يهزونا لبوشوشة  و  يحطونا  في  ڨلبو نغنيو بالصوت

و نصيحو لين يفدو  و  يقولو ملا  رهوط

و  نتعداو دعارة  و المساس باخلاقيات.

على جرد  ورقة  و تصحيحة..

و نخرجو  و  نرجعو لدويرتنا  و نلقاو فار في  كوجنتنا

و  نربّوه  و  على  اسم  الشرطي  إلى  قص  علينا  الحلاوة نسموه

و  نادولو  سي  الطحّان.

و  نجيبو  برشا  كعبورات ..

و نشعشطولهم  الشعيرات..

و ننصبو  بيهم  فالبساج  و نعملو الفن ..  عيلة مهبولة  بنينة..

و نفهموهم  إلى  هوما  ولاد  حُب موش  ولاد  حرام..

و  نعملو  ثورة.

و  نضفرو الشيب و  نبقاو  بلا  سنّين..

و نكتبو على قبرنا

عرسنا على  طريقتنا..

و  شهدت الڨمرة  على  سنّة العشرة و  راسولها

و  مصححناش.

منستحقوش.

و  نموتو..

و يدفنونا.

و الدود ياكلنا..

و الحب مجاورنا..

و ما  صححناش