نحب نقول نحبك

amour-infini-revesRyhab Jlassi - رحاب الجلاصي

نحب نقول نحبك .. الحب مش عيب و لا حرام .. الحب لا يستنى عيد و لا مواعيد .. الحب بذرة لازم كل واحد يزرعها في قلبو و يسقيها و يراعيها .. الحب احساس كبير مش كلام مع الغير .. الحب حياة و حتى بعد الممات ..

نحبك امّي و نحبك بابا و نحبكم خواتي .. نحبك قد الحب باارشا حب .. نحبكم بدلالي و عزّي بيناتكم و دنيتي الي محلاها بيكم .. نحبكم صاحباتي بهبالي و تخرنيني و دمعتي الممسوحة بيديكم .. نحبكم انتم يا ناس الي تحبوني و فرحتوني و نسيتوني وجيعة و لقيتكم وقت الحاجة .. نحبك قرايتي الي حلمت بيك من صغري و الحمد لله وصلت ..

نحبك يا شموسة كيف تزرق في قلب السما و نقولو يااا محلاه طقس اليوم .. نحبك يا مطر كيف يرحمنا بيك ربي و تغسل ذنوبنا .. نحبك يا دنيا يا محلاك و مخيبك ساعات .. نحب كل حاجة موجودة في حياتي .. كل حاجة كتبهالي ربي ..

الحب بنين كيف يفرحك ، و الحب ما يوجعش اما بلاصتو الغالطة هي الي توجع ..

الحب كل يوم موجود اما عيدو يفكرك في باارشا حاجات !

نحب و نحب و نحب.

رحاب الجلاصي

 نحب نقول نحبك