وقتلي تاقف الزنقة بالهارب و ماعدش فيها لا تقاوم و لا تحارب

وقتلي تتقلب حياتك مالنقيض للنقيض و القلب يفرفط لا حب يركح لا يريض , مع كل غروب شمس نستقبل جحيم جديد ,قلبي المعبي بالغل تتغرس فيه سكاكن حديد , نعيط, نخبط, نبكي دم يهبط اسود كالفحم

ليلي عليا طوال و حبك شوك واحل في جواجيا مازال , عينيا منفوخة مغدرة مالبكا عمات و قلبك ينبظ فيا لتوة لا مات

وقتلي نعمل مالضعف قوة و نقول توة حد ما يزعزعني كي يبدا هو

عشقك يغول في وجهي, يخرج من اكا التركينة في قلبي و يحلف بالامانات السبعة نتبعك حتا كان حياتك ترهن

نجري, خيالك يتبعني

نهرب, ندعثر في ذكرياتك الي حاولت تمنعني

نطيح , نخبط , بوجايعي نتلطخ و راسي نهبط

صوتك مالوحش خانقني نتمنا الارض تتشق و تبلعني

نحاول نقوم مرة اخرا يشدني الكلام لي كنت ليا فيه تقول

مالضحكة نبكي و نتفكر كي كنت نجاوبك و نقول لي يسمعك مهبول

لا حبت تتلم جروحي و لا بردت النار الساكنة في روحي

صوتك, تبسيماتك , ضحكاتك , حتا تنهيداتك , حبل علا رقبتي ملفوف كل يوم يزيد عقدة علا عقدة القدام مش لتالي ,نتنهد و يجي علا بالي كيف كنت حامل هبالي ,

الدنيا وساعت عليا ,قلبي ضياق بيا لا حب ينسا لا يخفف عليا , بدني تخدر و ماعاد عاز شي عليا بعد عشقة خذات كل شي فيا, مازلت مفرحتش بيه الموت خذاتو من بين يديا , "موت بالحيا" هذا الدنيا اش حكمت عليا ..