يكفي انو العين ماتراك كان انت ،  اليد في اليد ، القلب واحد و النفس واحد و الروح اكثر من اثنين  .. الروح اكثر من  اثنين ، كيف تسيبنا وحدة نعيشو بلخرى و ديما فرحانين و زاهيين ، هكا تفاهمنا يا زين الزين  ..

يسكت القلب و تفشل الايدين و تظلم العينين و تبقى روحنا تصول و تجول في كل بقعة تلمينا فيها و كل ذكرى مسيناها بيدينا و سمعنا دقة القلب تشرنينة بنينة ..

كل نبضة منا ماتموتش تبقى تحكي علينا .. في كل نبضة ألفنا رواية و كتبنا حكاية و سمعنا للناس  غناية ماتتنساش و ماتموتش مع الاجساد ..

روحنا لخرة ( الاخيرة ) تطلع للسما تترامى من نجمة لنجمة ، تلوج في ضحكتك وين خبيتها علينا ، تعودت نراها معكوسة في كل وحدة ، وين مشات ، تي راو بالعكس اللي فينا موش مكفينا  ،  تهرب ، تهرب ،  و تتكا على الڨمرة اللي  تصويرتك منحوتة  فيها ، و ضوك يا ڨمرة ما يقوا عليها ، ضوك يزيد لهيب فراقك ،  لهيب بعادك و ما يطفيها ، اما نارك ماتحرقني ادفيني و بجنبك تخليني ، نحبك تزيد على مابيها ، الروح بيك تتلذذ  مادام هاكاك رضيت عليها ، و لقيت باش تكافيها ..

موش هكا تفاهمنا يا زين الزين ،  مالا شكون مشا و خلا ..

انا و لا انت ولا احنا الاثنين ..