Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

ما تلوميني

fuite-jeunes-immigrationNadia El Ouni - نادية العوني

ما تلومينيش يالخضرا

و لاش  لتلوميني

انا اللّي جيتك

و انت اللي ردّيتيني

راعيت شِيبْتك

ڨلْتْ نبِرّك

في شبابي ضَيَّعتيني

لا كشِفتِلك يُوم سرِّك

بأَصلي عايرتيني

و الأصل منِّكْ

لا نذِلّكْ  

فَكَّرْتِكْ

يا ناسيتيني


ما تلومينيش يا الخضرا

و لاش لا تلوميني

انا اللي وفِيتْلِك

دام ظِلّكْ  

و انت اللِّي بايعتيني

جُرْتِي

شْكِيتْلك

عملْتِي ما سمعْتيني

انا اللِّي

حرثت ارضك

و احفضت عرضك

و صليت فرضك

ڨولي

باش كافيتيني !


ما تلومينيش يالخضرا

و لاش لتلوميني ؟

انا اللي عبِدْتك

دِيني

و انت اللّي كفَّرْتيني

طَمَّعْتِني بزهْوكْ

...غشِّيرْ

و غَشِّيتيني

و يوم شمَّرْت ذْوارعي للجَدْ

طْلبتِي الكْتَافْ

ڨلتي الذّوارع ما تزَزِّيني

وكيف ما لي حد

غَسَّلْتي

كفَّنْتي و دْفنْتيني


الغدوة مهاجرك يالخضرا

بطَّلْت نلُومك

فلا تلوميني


الغدوة مهاجرك يالخضرا

ومن غُلْب غُلْبي

نتْمنَّى غُدوة ما يجيني...

نادية العوني
ما تلوميني