رد بالك، رد بالك، رد بالك تحب واحد على خاطر قلك نحبك وحلف وتكتف.. حتى كان حلفلك براس الوالده وقلك حبك نعبدو عباده.. رد بالك، رد بالك تأمن حد على خاطر كلامو عسل يقطر.. رد بالك تصدق حروف يتكتبو ويتفسخو وينجمو يتسرقو مالكتب.. رد بالك تصدق حاجه ما ريتهاش بعينيك.. وسيب عليك من إحساسك.. إحساسك كذاب ما فيهش أمان.. واللسان زاده غدار خوان.. بكلمه تلقى روحك لفوق وبكلمه طيح لوطه والطيحه مالعالي راهي ياسر توجع!

رد بالك تصدق اللسان.. صدق العينين.. صدق الأفعال..

ما تصدقش عبد قلك نحبك.. رد بالك! ما تصدقش حد قلك نحبك مرتي ونحب نعيشو مع بعضنا بقية عمرنا في نفس الدار.. صدقو كي تراه بالياجوره يبني فيها..

ما تصدقوش كان قلك راك الأولى..

صدق كي تراه يعمل في مجهودو باش تكون الأخيره..

ما تصدقش كان وعدك عمرو ما يبكيك.. صدق كي بالحق ما تغيبش عليك الفرحه كي تبدى معاه..

وما تصدقش الكلام المعسول المسروق مالأفلام ومحفوظ..

ما تزربش وما تغرقش فيه.. وما تقولش قلي.. يلعن جد بوه فعل قال راو غلب عليا وقهرني! كان قالولي تمنى راني قلتلهم نحييولي هالفعل وبعدو عليا القيل والقال في ليله ونهار..

رد بالك تصدق الكليمات اللي تدخل للقلب طول.. تذوبو وتلينو وتطير بيه وتبنيلو في الجنه أحلام..

صدق التصرفات والتطبيقات.. وما تسألش شنوا لازم يعملي باش نصدق.. خليها مسيبه وإستنى وشوف مع كل ظرف وفي كل وقت شنيا الحاجات اللي تتمناه يعملها.. وكان عملها صدق ما فيها باس..

لا محاله حتى الأفعال ولات ساعات تكذب.. الكذب ملالنا حياتنا وخذالنا منها بلاصه كبيره أما في الهم ديما عندك ما تختار..

نصدق تبسيمه خير ماللي نصدق كليمه في قالب تفليمه..

وبلاهي أخطاونا من شكاير الكلام.. صدعتولنا ريوسنا بالحس والحديث والمحفوظات والوعود وكلام البارح نفسو كلام اليوم... وتو نعملك وتو يجي نهار وتو تشوف وتو نوريك وتو تصدقني وتو نكون في المستوى.. يعطيكم داء قداش رخستوه الحب بنحبك ونعشقك وإنت متاعي وواحد مع واحد يساوي واحد والكذب عالحساب بالكذب..

الحب حاجه بنينه.. الحب هبله.. الحب فازات مش كلامات وسلامات..

ما تصدق اللي فما ورده كان ما تشم ريحتها..

وكلامك حلو وقتلي أفعالك تكون أحلى..

أسكت ما تقوليش نحبك! أمان معادش تقلي نحبك!!

إيجا بينلي حبك..

إيجا وريني الحب..