كيما ليوم ياعمري كيما ليوم،سنين لتالي ريتك و قداه لوقت يجري و كيفاه السنين يتعداو في رمشة عين،كيما ليوم و كيما هل الوقية وفي نفس لبلاصة قاعدين و موزيكا بنينة تضرب و صوة الموجة محاذيها يدندن عليها،نتذكر كيما توا و كيفاه ننسا و لواه ننسا و قداه تحبلي باش ننسا وجهك و غزرتك و ضحكة عينيك الي لتوا واحل فيهم،انتي متتنساش انتي في قلبي معشعشة تحكم باحكامك الكلمة كلمتك و الشورة شورتك الي تقول عليه هاك هوا.

ليوم جيت لبلاصتنا و قعدت على حجرتنا اما ماجيتش وحدي جبت معايا فاليجتنا فاليجا معبيا بالذكرايات فالجتنا الي خبيتها في قاع قلبي و سكرة عليها بالف مفتاح من نهارة صار الي صار لمدت الي لينا و الي علينا،لمدتهم و عينيا مغمضين و قلبي ساكت لا حس لا خبر خايف مل عينين لايقولو عليه كلام حزين و الا يقولو مسكين ماشاف في حياتو نهار زين،منحب حد يسخف عليا و يقول هل مغبون والله ناس ملاح و لايهون،

انا شفت و عشت الي ماشافوش راجل غلق الستين انا في ضحكتها شفت الفرحة الي قعدت سنين نستنا فيها و نلوج عليها و في عينيها شفت عجب الدنيا ودرت العالم مالسند للهند وأنا في بلاصتي،معاها تعلمت نحكي في السكاة،تعلمت نحب الناس و على هل اﻷساس نعيش،قد مانحكيلك مبردو الشتاء و مكبر وحشو و مطولها الثنيا بلاش بيك بلاش حديثك و هبالك و دلالك،و ريحتك،ريحة الياسمين.

لوجت عليك في الثنايا الي مشيناهم الكل فمشي ما تعرضني فصباح مالصباحات بهاكي التبسيمة سألت عليك الي نعرفو و الي مناعرفوش و شي النافع ربي.مانيش نلوم فيك خاطر نعرف الي كان جا بيديك عمرك لا تخليها بيا وكنت تختار البعد أخر ثنيا،الشي الي صار اقوى مني و منك هاذي حكمة ربي هكا شنو نجم نقول،الحمل الي هازو على كتافي رزن عليا،وفاني..ماخلاش فيا القوة ماو كنت تقلييا جبل ما يهزك ريح انا توا بنفخا نطير،حاسس روحي كبرت على غير عمر سكرت على روحي و هربت خفت نواجه حقيقة خبيتها ليا سنين،

انا ضعيف قدام الشي الي صار،حقيقة انو في نهار نقوم و ما نصبحش على وجهك نحكي معاك و ماتجوبنيش نلوج عليك و ما نلقاكش صعيبة علا راجل كيفي مات و عاش بين يديك فنا عمرو عليك و شاف الدنيا في عينيك،عينين الغزال دنيتي الي عشت فيها و الي كان نتعدى حدودها نضيع و ما نلقاش ثنيا انتي الي سميتك حياتي و تنفستك كل الهوا،مشيت و خليتني نفرفت كالغريق كالميت بالحيا نمشي و ندعثر فيك كالغشير الي يتعلم في أول خطوة في حياتو،واحل في حكاياتنا في الي تعدى علينا في كل فرحة دخلت لقلوبنا بعد كل غصرة عشناها، نبات و نصبح عل الذكريات عل التصاور على فيروز و أم كلثوم الي بليتني بيهم اما لواقتش؟و قداه باش نقعد هكا؟ ليمات،الشهور،لعوام طايرا مني و انا بين أربعة حيوط ضايع في الدنيا ضايع فيا و فيك.انا ليوم تقويت على روحي على ضعفي و جبني جيت نحكيلك وجيعتي جيت نفرغ حمل اعوام ضاعت، يزي ماهربت سنين من موتك و كذبت روحي و الناس و قاسيت و بكيت حتى نشفت دموعي.رخيت راسي و مشيت كلي عامل عملا خليت كل شي ورايا و هربت،خليت بنتي،بنتنا الي من وقت حلت عينيها ماحطيتش يدي عليها.ناقم عل الدنيا الي خذاتك مني في نفس اللحضة الي تولدت فيها هك الملايكة الي لا عملت لايد لا ساق حملتها ذنب اكبر منها ومن طاقتها،ليوم جيت نواجه ليوم جيت باش نشم ريحتك فيها،نشم ريحة الياسمين ..