Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
كتبت عليك حكاية
Saida Jaafer - سيدة جعفرصغري؟ عديتو نحب فيك
كبشت و ما سلمت
عديتو نكتبلك في الأشعار و الرسايل
و نحطها تحت مخدتي
و نرقد علاها
و ما ننساها
نقراها لروحي كل ليلة ،و نضحك علاها
نطل من الشباك بيتك ضاوية ولا
نشوفك اكش فايق ، باش نجي نتسلف من عندك كراسة الإيقاظ العلمي وقت المدرسة
كتاب التاريخ و الجغرافيا وقت الليسي
و نتفارقو في السوڨندار و ماعاش نلقى باش نتسبب باش نراك.
كنت تافهة. .ممكن، ولا نقولو بسيطة
حكاياتي و يومياتي
كانت معبية بيك
صفحة اثنين خمسين و ميتين
تحكي عليك
تهتري ب حبي الطفولي ليك
الصاحبة الوحيدة اللي كانت تعرف أسراري
فضحتني و عراتني قدامك
مالأسرار، مالحب المخبي و الخنار لي بايتة فايقة راقدة
نعاودلها فيه، راسها وجعها تلقاها
حبت تجي تقلك
عليا
عاللي بيا
و عاللي صاير فيا، منك.
خانتني ،و اني و انتي بعد ما كنا عالأقل خوات مش من نفس الأم و البو
تغاربنا و لا عاد تلمنا لا المهدية ولا بحورها
قطعت يومياتي وقتها
آخر كلمة كتبتها فيها
لتو نتفكرها "قالتلو"
تفضحت، تخنت، تعريت،.
و ما نجمتش ننسى
سنين، قعدت نتعلم فيهم كيفاه نرسم
نتفكر ملامحك و نستحضرها
و نرسمها عالورقة قدامي و نخليك حاضر
معايا و حذايا
مش كان ف منامي
رقدتك بجنبي و تحتي و معايا و قدامي
و قلت هالوجه يجي نهار و نرجع نراه
حبي ليه نخبيه و ما ننساه
بعد الرسم
خلقتك في أوراق
في كتيبة
صنعت منك كتاب
حكيت عليك في رواية
و كتبت عليك حكاية
المفيد تبقى حي معايا
و اه
مالوجيعة اللي استحملتها
من قلوب ما فهمتنيش، من اصحاب ما عذرتنيش
من سنين تتعدى و ما نراكش و ما ترانيش.
يا ليتني نطقتها وقتها، وقت شفتك كي عطيت الدورة نهار لي سمعت بيا
و صحت و قلتها"ما تمشيش! "
يا ليت لساني ما خاننيش
يا ليت حبس الوقت
و كملت قلت و حكيت
يمكن راني تو بيك و معاك و ليك نعيش.
أما يزي، م يساعدنيش!
قلبي فاض، و تعرف قلبي مش كاس، قلبي بحر و يرفع الناس الكل،
و ساعك وحدك
و لا كل لا مل
أما يزي.
نحب نحب من جديد، نحب نخرج من هالعالم
لي ما قعدتلي فيه منك
كان جرد تصويرة مدرسة
نمد نبوسها كل ما نتوحش سماك
كل ما نمد ايدي باش نسلم
و ما نلقاك.
صنتك في قلب، انتي ما استحقيتوش
تعب و شاب،.
اثناش سنة
عمر عبد و كبر صغير و قلب تتبدل
أما اني أيست
من انك تجي
من انك تكون كيما كنت قبل
من انك ترجع
نحب نعيش في واقع انتي م فيهش
يزيني من خيالك لي لاصق حيط بيتي
و يغنيلي كل ليلة لين نرقد
و في الصباح يختفي
يزيني منو، و منك
ومني
و مالدنيا لي ماعاد سايعتني
يزيني .
سيدة جعفر
Website Design Brisbane
Tags: