Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
قداكشي نية
Saida Jaafer - سيدة جعفرهو انت بطبيعتك معاش تسأل فيا
أما هاني باش نقلك
راني مانيش لباس عليا
من وقت اخر مرة حكينا فيها
و الدنيا تقلبت عليا
الناس حازوا فيا
و بين كل شوية و شوية
نسيق عينيا بدمعات
تخرج كل ما نتفرج ف تصاورك و كلامك ليا
قداشني كنت نية..
ههه،.. وين نعرف عليا
كنتش نسخايلني باش نطيح ع راسي
و من جرايرك نولي دهصة معمية
لا نرى في حد غيرك
و لا عيني في حد غيرك يحكي ليا
على همومك و مشاكلك
و نبرة صوتك الحنينة و انتي فرحان تخليني كان نلقى ناكلك
كان نلقى ندخلك فيا و ما نخرجك
تعرفني كي نحب نمرج اما وعدتك ما نمرجك
اوعدني.. تي وينك قد ما سمعتني
تو وليت دخل منا خرج منا
علاش تفسد فيها و ماشي تو وقت محلانا كنا..
الساعة عقدت فيك النوارة، قلت مش كيفك كيفهم
خيالك مش كي خيالهم و طيفك مش كي طيفهم
موزيكتك غير، و هبالك غير و غرامك مش كيف
تحب بيتك اكثر مالشارع و تكره الشتا و تحب الصيف
تكره المدينة و تبدى تستنى وقتاه تروح لداركم في الريف..
نحب نجيك، نحب نقربلك، نحب نراك
قداه لينا عمرنا ما تلاقينا
قداه سهرنا، تكلمنا، حكينا
قداه قلنا محلاه لي بيناتنا، و تو شبينا..!
قداشني كنت نية،
كي صدقتك وقت قتلي محلاك بنية
محلى البن في عينيك و الشمس في شعرك ساكنة
محلى نبرة بكاك و صوت شكاك و ريحتك و انتي تضحك كي تفوح منك ياسمينة و فلة
و مع كل صباح على حلة عيني و حلة
نستنى كلمة منك
معاش لاقيتها غير في حلمة
قداشني كنت نية، وقت صدقتك و خليتها تحبك
هاك البنية..
العايشة فيا و ساكنة جاشي و خليتها تحول دارها و تسكن فيك
جيت انت مشيت و خليتها، نهار كامل و هي تصيح و تعيط و تبكي و تقول تحب عليك..
قلها تو نجيك، تو نوصللها، نقلها اللي انت باش ترجع
نقلها تهنى مش باش يعاود يخليك، يزي مالبكى دموعك شاحت
هاو جايك و اشبع بيه
اما ما تغزرلوش ياسر في عينيه
تخاف تغرق و انتي نعرفك ما تعرفش تعوم
صوتو كوم و عينيه كوم، و قلبو المعبي بغيرك كوم
قوم، يزي ما طيحك، قوم امسح دموعك و عوم
يزي ما غرقت و من ثقلك طحت للغريق لين معادش نشوفك
تي قداه مني ليك
قداكشي نية
مع اللي مش شايفك،
قداكشي مسكينة يا بنيتي..
باقي مازلت مصدقة باش يرجعلك؟
سيدة جعفر
Website Design Brisbane
Tags: