عمي وقف شوية
Chaima Rekik - شيماء الرقيقعمي عمي ، بجاه ربي و قف شوية
عمي وقف شوية خنظفلك صباطك عالتعدية
وبعدها اعطيني خمس مية عندي بيهم قضية
ناوي نشري بيهم دواء لامي نور عينيا
و قلم و كراسة لخويا الصغير اللي في المكتب
و باكو دخان لبابا اللي ديما فيا يضرب
و نشري ضميدة ليدي باش ما يجيش نهار و تتعب
زعما يكفيو و لا صباط آخر لازم نظف ؟
شبيك تضحك ؟
و شخص كان تفضلي من الخمس مية مية
باش نموت على فرتونة قلوب من امس العشية
و نزيد عليها حفنة كاكوية
شبيك تضحك ؟
و ماذابيا نتعدى للخضار نشري تفاحة
شفت صحابي ياكلو فيها و قالوا قارصة فواحة
فرد مرة نتعدى للجزار ناخو لحيمة
و نرجع للدار نشويوها و نقسموها و يبة و يبة
شبيك تضحك ؟
نحب نشري خلاص لشعر اختي اللي يهبهب
شعرها طويل مسبسب اما بلاش خلاص قعد شوية مشبشب
نسيت اللي لازمني سبادري باش نلعب الكورة في المكتب
مكسبني شلاكةالبارح من المشي و الجي تشرمطت و تقطعت
كي كنت صغير كنت نحلم نولي طبيب اما تو شي ما يفيد
شبيك تضحك ؟
عمي راني مقاش صغير و السنين بينا تطير
عمي راني عمري عشرة سنين
لا هم نهار و لاهم ثنين
اللي تعلمتوا فيهم ما يشيب الصغير
مانيش صغير
عمي عمي ، مدلي صباطك تحليت في الحديث و تو تعطلني و نعطلك
و لا قول ماعندك ما تعطلني انا اللي نعطلك
شيماء الرقيق
Website Design Brisbane