علمني نحبك

amour-couple-eternelMonia Messoussi - منية مسوسي

ياخي المحبة كيفاش تجي... علمني تراه.. علمني نحبك كيف ما تحب انتي موش كيف ما نحب انا...

انا محبتي مش كيف العباد.. مطلعة تطليع على قياس قلبي.. محبتي مرا زعبانة ما ترا في الدنيا كان قلبك و عينيك..

مرا حاذقة و مصرارة منين تدور ملفوفة بيك.. محبتي طفلة صغيرة تعمل عمايل بالسرقة و تجري تتخبا بين يديك... غادي ميوصللها حد و ما يمسها حد.. لا الغول و لا بوشكارة و لا حتى قحرة تحت حس مس..

غادي تفرعن و تتهز و تتنفض تضحك..غادي فيسع تكبر و تولي تبربش في تراكنك.. توشوشلك في وذنك غناية من اولها لاخرها كلمة برك.. نحبك.. تنسيك في هرج الدنيا... محبتي لكموتة سحاب بيضة طايرة فالسماء.. لا يهمها برد و لا شمس و لا ثنايا...

سحابة ما يهمها كان تضلل عليك حرارة الشمس اللي تجهرلك عينيك .. و تفرق عليك حضبة السحاب المكدس فوق بعضو باش ما تمطرش عليك مطرة قوية تبللك حوايجك ... تفرقهم باش ما يطرشقش الرعد و يقلقلك وذنيك... محبتي روبة حمراء معلقة في فترينة ...

معمولة للبسة على ضوء شمع فوق طاولة لكلها شكلاطة... بش تسرق مع كل كعبة بوسة من فمك تزيدها زين على زينها .. بوسة تقوي في شيخة الشكلاطة اللي تولي وقتها اقوى من شيخة السكرة اللي يحكيو عليها.. محبتي هبال يمشي على ساقيه مايركحش و ما يهداش تقول صغير فرحان بساقيه.. محبتي قطوسة تخبش على صغارها و تقسم الباي عالحس و يا ويلو اللي يدور بيها.. محبتي في عينيا مطلعة على قياس قلبي و قلبك ..

علمني نحبك كيف ما تحب انت.. كيف ما تتمنى انت.. كيف ما تحلم انت.. علمني نهرب بيك لبعيد.. لبلاصة انت تحب توصللها.. نهزك لحلمة بين عينيك تتمناها و نفكهالك بيديا من يدين بياع الاحلام..  علمني نحبك كيف ما تحب انت و نعمللك ثنيا نفرشهالك بزرابي القروان و نجيب الناس من هنا و من هنا انت تمشي و هوما يسميو عليك انت تبدل خطوتك و هوما يزغرطو عليك.. علمني نحبك كيف ما تحب انتي و نستناك عقاب الليل بالماء السخون و الفوطة و عينيا مكحلين..

نمسدلك ساقيك و نخبيك في شوني لين يهزك النوم.. علمني نخبك كيف ما تحب انت.. مالنسمة نغير عليك و ما نحملشي فيك.. علمني نحبك كيف ما تحب انت فماش ما محبتي قد ماهي مفرحتني ترضيك...

منية مسوسي

علمني نحبك