Zaineb S. - زينب س

نهارين ،ثلاثة ماكلة و نوم ما نعمل شي حتى لولاد خليتهم لكريمة لاهية بيهم ،خذيت كونجي مالدنيا لكل ،فديت مالفرش قمت حليت الفايسبوك نلقى انفيتاسيون من عند كريم ترددت شوية بش نقبلها ،ماللي عرفت هارون و الفيسبوك عاملتو كان للفامي و كعبات صاحباتي و بعد اقنعت روحي اللي ما فيها شي ،حسيت روحي مستحقة نحكي معاه بالاخص اللي ماللي خرجت مالدار هارون ما كلمنيش جملة يكلم كان كريمة يسألها عالصغار و قالتلي اللي ما جبدش عليا ،قبلتو ديراكت كلمني و بدينا نحكيو ،حكينا ليل نهار فرغتلو قلبي و حكيتلو اللي صار و هو سمعني ساعة يواسيني و ساعة يبعثلي حاجة تضحكني ،بديت نرتاح شوية و نخرج مالديبرسيون اللي عشت فيها اما لخدمة ما نجمتش نرجعلها زدت بعثتلهم سرتفيكا و قولت خسرت راجلي خلي الخدمة ..حاجة غريبة قاعدة تصيرلي و مش فاهمتها نحب نكمل كريم ديمة وين لمشكل احنا صحاب ما فيها شي هكا اقنعت روحي لين لقيت روحي نهار قدام الرستورون متاعو ،شافني ما صدقش جاني يجري فرح بيا برشا

-اهلا بالغاليى ،مله مفاجئة !!

-هههه ماو وعدتك بش نرجع بحذاك و زيد اللي يضوق ماكلتك ما ينجمش ما يرجعش

-ههههه صار جاية لماكلتي مش ليا انا ؟؟

-تي يزي مالتشوكيع المهم جيت

-هههه ايا باهي يا للا هيا ايجا نفرحو بيك ...

قعدت مقابلتو حكينا برشا ،ما سكتناش ،الحاجة اللي فرحتني كريم ما جبدليش على هارون جملة ،تجاهل لموضوع ،ما نعرفش على خاطر هو يحب ينسيني و ما يحيرليش مواجعي ولا على خاطر ميحبش يجبد على هارون و

معتبرو مش موجود في حياتي ...