صاره هوّ هكّه الحبّ ؟

amour piège

Sonia - سنيا

 

صاره هوّ هكّه الحبّ

 

ملّول حلوّ عسل يقطّر أما بعد سمّ ملعنين يتنطِّر

 

ملّول خفيييف ضريف ، نسمه تعمل الكيف اما بعد يولّي رزين يفدّد يغدّد كلْخريف

 

ملّول ربيع منوّر بالورد ريحتو فاوحه في ٱلوانو سارحه ٱما بعد مشوم يبكّي كليالي الشّتاء بالبرد القلب يعبّي

 

 

 

صاره هوّ هكّه الحبّ

جنّه ملّول ، كلام مغرّق في السّول ، حبّ لخّر و لول ، تفّاحتين و عنب و تين و ما فمّا في هل دنيا كان زوز

هيّ و هوّ و باش تعشقو للّي يولّي عزوز ..

هوّ و هيّ و باش ياخذها فقيره ولا غنيّه..

هوما لثْنين محبّه رآبطتهم ماكنتهم عابدتهم لاهمتهم حاصرتهم و مهبّلتهم

وبعد نهارين ، شهرين ، و كان ربّي حبّهم عامين ، تطير النّفحه

يولّي كلب  و هيّ يعيّطلها لفعه

الحبّ يولّي نكد ، غمّه عل قلب ، حجره تقصّ عليهم النّفس

هوّ عليها يعسّ ، هيّ صياحها قْبُب و قلبها لكلّو نقبْ ،

البدن رزن و صوتها في راسو يوجع و يزُنّ

كثُر عراكهم ، قرب طلاقهم ، و الباقي شامتين لفراقهم .

 

صاره هوّ هكّه الحبّ

لعبه ماسطه ملّول تضهرلك ساهله بعد تولّي لاسطه

ملّول  تدخل في الرّبح أما فلّخر تخرج خاسر

ملّول بمحبّتو تتفرهد و بعد قلبك يولّي يعصِرْ

تفرح و تقول وصلت

و بعد تفيق إلّي في شْباكو حْصُلتْ

الّي تعبدو أكثر من ربّي يطلع شيطان

ملّول يفرهدك و بعد يسكّر عليك البيبان

يحلّك في الجنّه وديان

و بعد يرميك في جهنّم من غير ما يْبان

 

صاره هوّ هكّه الحبّ

يعطيه كْلب

يكركرك ليه ، يجبدك بالسّيف و يحطّك تحت ضوّ حتّى لين تذوب و تسيح

و بعد بسكاكن حافْيه يذبحك و يعذّبك تعذيب شديد و ماتعرف وقتها كان تصيح

ملّول تحبّ الخايبْ قبل الباهي

و بعد الحبّ يبعد عليك و بغيرك يولّي لاهي

ملّول جنينه منوّره

بقعة من ألف ليله و ليله مصوّره

و في ليله تتقلب تولّي بير غارق

و تقوم من كابوسك عارق

 

صاره هوّ هكّه الحبّ ؟

الحبّ تسخايلو صرّه مليانه تحلّ تلقى خيط

تسخايلو بحر تجي تدخل تُصدِم في حيطْ

الحبّ طلع كالزّير المتّكي ، لا يضحّك ٱما ديما يبكّي

 

صاره هوّ هكّه الحبّ؟

منآمة عْتارس

تطيح على جْرانه بعد ماكنت تسخايْلو فارسْ

 

Sonia - سنيا

 

صاره هوّ هكّه الحبّ ؟