سْتنّيتكْ
Raouaa Khouildi - روعة الخويلديسْتنّيتكْ
لا عندي الغيرة
ولا تعدّى نهار فيه ماتمنّيتكْ
وقلت بخلاف اللّبسة والبيتْ
كان تحبّ نقسم اللّعبة على ثْنينْ
سْتنّيتكْ وتمنّيت نعنّقك وسط هاك الكهفْ
نتونّس بيكْ
وتصبحْ البلاصة مشِرْهة
وجُودك بالنّسبة ليّا قنْديلْ
تسعة شهُر مانخلّيكْ مستحقّة شئ
كي نجُوعوا .. مانْحّيش من عظم أمّي
دمُوعي نرّدهملك حليبْ دافي مايتْباع كان للبيّْ
ونُخرج أنا لُولى ..
وإنتي تكُونلهم الصّغيرة الدلّولة ..
سْتنّيتك وحش الأرضْ للمطرْ
حبّيتك تكون شطري .. في الوجه في البدن في طول الشّعرْ
ونلبسُوا كيف كيف
تعرف جيّانك للدّنيا عندي اش معناها ؟
الصحراء ينتبْ فيها النوّار
والجنّة يعشّشْ فيها إبْليسْ ..
وقدّاش تمنّيتْ هاك النّهار إلّي نطيحُوا فيه ريشْ
على خاتر قتلك الطّفل هذا ماتبّعوشْ ..
وإتّلهى بقرايتك ويزّي مالخروجْ
وكي نحبّ نرضّيكْ نمرجكْ بالبُوسْ ..
ستنّيتكْ
خاترْ اليوم حبّيتْ نتّسْندْ على حدّ
حبّيتْ نتّسْند على أُختْ
خاترْ حنيّةْ الطفلة مش كي الولدْ
اليوم سمعت وحدة تحكي في قفايا
هي و وحدة أخرى .. حسبتهم أصحابي كي وجهي والمراية
حبّيتك تتعلّم منّي خاترني أكبر منّك بدقيقة
وإلّي في هالدّنيا ماتعطي كان فيّا الثّقة
سْتنّيتك
بش نحكيلكْ زادة على الحاجات الباهية
وتكونلي صندوق عجبْ .. نهزّو معايا للاّخرة .
روعة خويلدي
Website Design Brisbane