خاطرني

مبعد

باش نفيق من حلمة مزيانة

كنت واحلة فيها

بين صحوة و منام ،حلفت م نقوم، و م قمتش

و كمّلت رقدت.. و م قمتش

و بقيت نحلم، و جيت انت، و دخلت فالحلمة، دخلت فيّا، عشت فيّا و عيّشتني

خير من بدن عشت بيه،قتلني و م عيّشنيش،.

بدن منغزرلوش، نحسّو عريان فالظّلام، نتحسّسو، نمسّو نجسّو، و ميعجبنيش، و منحبّوش و نوصل نكرهو، نضربو، نقطّعو، نعذّبو

تحبّبني فيه انت

و تجي من كوكب اخر، م فيهش بشر، فيه كائنات اخرى، تنجّم كان تضحك ب عينيها، فيه فن و عيون واسعة جميلة ترا كان المزيان، لكني م كنتش مزيانة، انت زيّنتني ب عينيك و جمّلتني

لكني مبعد قمت

نلقاك انت ف بر و انا ف بر

انت بر و انا بحر

قاعو غااارق و اظلم

و انت م تنجم تكون كان ضو يشعل يضوّي و يورّي و يحلّ قدّامي الثنايا

جيتني و قربتلي

و ب كل ذرة فيك، ب كل كتلة لحم في شفايفك، عبّيت شقوق رقبتي، غطّيتها، حبّيتها،  بستها ذوّبتها شفيتها..

و البدن رعش لـ لمستك، و فوقي تفرشت ..و تحتك تخبّيت، مالقلب، مالعينين، من وجيعة كل م نمسّها تعاود تتحلّ و توسع الجرح من جديد، غريبة فيك تقلّي فنان، و انت طبيب تعرف تداوي،

هاك داويتني، قبل لا تعاود تمرّضني

قبل لا تعديني بيك

قبل لا نحب نعنقك، نتخبى فيك و بيك، و وراك و تحتك و فوقك، و في جواجي جواجيك

حرام عليك، تخليني مكوية، و النار تشوي فيا

حرام تلوعني و تذوقني طعمك و تشمّمني ريحتك فالهوا توصلني، مبعد تجبد بيّا

يدك مازالت طبعتها على صدري

مازال دفاه يشهد انفاسك تعدّات فوقو، مازلت

نسهر نتفرّج فيك، مازلت ترقد و تخلّيني مريضة بيك

نتبّع فيك، و نتكوا من بعيد

تسهّرني و متعلّمنيش نرقد، سايسني

سايس عليا، اك الضّحكة، و الربّ لي خلقها ما منجّمة ننساها، زح، محلاها مبهاها، مبنّ سماها، و مبن سماك ،نطير فاها بلا جوانح و ما يهمّني نطيح

نراك، ف منامي، راقد، و عينيا تاكلك ماكلة، و انت ناعس، و نكفر بالنوم لي ياخذك مني، و مالمرض لي يبعّدك عني

و ندعي الرب ليل نهار يجعلو فيا و لا فيك.، نرتّحك و نرتاح بعدك، و نراك لاباس. ،و ترجعلي، بالك.. ترجعلي.

نعرف معنديش الزهر،. فاللّخر باش يفوتني المترو

و باش ناخذ كار، و باش نجي نتفرّج فيك، و باش نراك من بعيد، فوق خشبة المسرح، و ننغر منها و نتجنّ، نهبل و ننسى علاه جيتك، و نروح بلا مـ تراني، و نراك يكفيني

و ترجع راقد على روحك، لا حس،ّلا جسّ يقلّقك.. نجي على خدّك نطبع بوسة، و نقلّك قوم

الحلمة وفات، قوم عيش

مزيانة الدّنيا ب ضحكتك فاها، مزيانة بيك

فايق مش راقد تحلم، صحيح حلوة الحلمة، اما تعيش دنيتك احلى ..

نحبك برشا.