حكايتي

Souha Najlawi - سهى نجلاوي

تحب نحكيلكم عليه، تحب نوصفلكم محبتو و رجوليتو ؟؟

ولا صدقو و تربيتو ؟؟

هيا يا سيدك بن سيدك نبداو

حبيتو و عشقني.. و مالفرحة ياسر كيسان ذوقني.. خاف عليا و صاني.. وكيما صاني صنتو

فرشلي الثنية عشق و محبة.. حبيتو و عشقتو و قلت شوية عليه هالمحبة..

من عينين الناس خبيتو.. أما الله غالب إلي في عينيا ما يتخبى..

سيد الرجال .. محبتو فاتت في كبرها الأجبال .. يشق بيا البحر و ما يخاف مالأهوال .. راجل في زمان الرجال فيه قلال

قد ما نحكي عليه و شوية.. وقد ما نقول و قد ما نوصف عمري ما نوفي حقو عليا

و كيما الحكايات الكل.. الليل و مايجيب الليل.. و هو فالليل ليا خليل

ضحكة.. تبسيمة.. كلمة حلوة و محبة مالي بها دنيتي..

لكن في نهار.. الشمس غابت على غير عادتها.. غابت بكري مش في وقيتها..

رعد مطر و صوت البرق يطرشق الحجر..

الدنيا ضلامت و الريح قوات و عينيا بالدموع تملات

كثرو في مخي الحكايات.. زعمة شنوة اللي صار.. شنوة لي يقلب المحبة في ليلة و نهار

برشا حكايات و برشا أسرار

مخي طرشق و عقلي إحتار.. جيت إيمين جيت إيسار.. ما هو هوني مولا الدار..

حبيت نفهم حبيت نعرف سبب هالإعصار.. لا لقيت جواب لا كلام نطفي بيه النار

قلبو ماهو غدار.. و في الكذب ماهو سمسار

لكن شنوة اللي صار.. الليل و ما يجيب الليل.. لكن هالمرة القلب في الليل وحدو عليل

و الليل في العلة ياسر طويل

نكتب في كلامي و الدمعة على خدي تسيل

حرت و حار معايا الدليل.. من كيسان الفرحة توة ترويت بكيسان الويل.. نبقى ديما نحبو و يبقى ديما هو الخليل

شفتو حكايتي محلاها.. زعمة شيعمل كيف يقراها

يرجع و غضبتو ينساها.. ولا حكايتي كيما رماني يرميها

بقلم سهى نجلاوي