حبني .. و ما تسألنيش علاش .. حبني أكهو .. كيما عمرك ما حبيت .. حبني كيما أنا نحبك .. ولا أكثر شوية .. ولا حتى أقل ميسالش ..

حبني حب ينسيني فلي عشتو قبلك .. و يخليي نحس روحي معاك تولدت من جديد ..

حبني حب يحكيواه على ألف ليلة و ليلة .. حب ينسي لعباد في شهريار و شهرزاد .. و في حكايات الحب القديمة و يوليو ما يحكيو كان بينا ..

حبني و خلينا نرسمو ع القمرة قلب نكتبو فيه أسامينا ..

حبني حب البو لبنتو .. خاف عليا خوف الخو على أختو .. و دفيني دفا أمي ليا ..

حبني و ما تنسانيش .. و مهما يصير أوعدني ما تخلينيش .. تخلصلي و ما تخذلنيش .. نعرفك شهال بدال .. تعشق السمرة و البيضة و لا مفلت لا طويلة لا قصيرة .. أما نعرفك تموت ع الصغيرة .. زعما كي نكبر ما تبدلنيش .. تي علاش كي نكبر! ..

تي حتى توا و أنا معاك ما تحشمش .. تغزر للبنات و ما تقدرش .. بعد دورها تفدليك و تبوستي من جبيني و تقلي "انتي في عيني للات النساء" .. و أنا نعمل روحي صدقت .. و نتفكر كي ديما  تقلي "على خاترك تو نتصلح" .. أما وقتاش؟ .. العمر يجري و انت لا تصلحت و لا حبيتني .. ولا حلاوة حبي ليك نساتك تحبني ..

حتى أنا نحب نذوق حلاوة حبك ليا .. و نعيش مهاك في دنيا موش هذيا .. دنيا فيها كان أنا و انت و القمرة مضوية ليالينا .. تقتلني بخزرة عينيك .. و حنانة لمسة يديك .. و دفاء صدرك الي كي نحط عليه راسي ننسى الدنيا و همومها .. تعنقني و تبوسني و تخلي مطعم ريقك مدوخني ..

حبني .. حب ما نقدروش بعدو على الفراق .. حبني و خلينا نحاربو الأقدار لين تتعب و تلين و تستسلم لينا ..

حبني .. حب الطير للسماء، حب الحوتة للماء، حب الفرططو للنار .. حبني و ما تقليش شنوا فيا يتحب .. حبني خاطر ما فيا ما يتحب .. حبني على عيوبي الي تحملها .. حبني على تخرنيني و غيرتي عليك الي تكرهم .. حبني على طلعاتي و غشي .. حتى كي نهبلك بيهم و نصدك أرجعلي و ما تخلينيش .. تعرف الي أنا بلا بيك ما نجمش نعيش .. حبني خاتر ما حبتكش و عمرها ما باش تحبك مرا قدي  .. حبني و كون ديما بجنبي .. خليني نحكي .. أسمعني و ما تحكمش عليا .. حبني .. حبني كيما أنا و رد بالك تقلي حاجة فيك ما عجبتنيش بدلها .. حبني .. حبني ..  حبني .. موش غدوة و موش بعدو .. حبني اليوم و توا ..

ولا نقلك .. لا لا .. ما تحبنيش .. زيد شوية .. و قلي ظروف .. ولا نقلك موش لازم تحبني من أصلو و خلي نقولو مكتوب ..

ما تحبنيش باش توهمني و تغلطني ..

ما تحبنيش باش في لحظة كل شيء يولي أوهام و يوفى الحب و تبقى الأحلام ..

ما تحبنيش باش تمشي و تخليني غارقة في بحر آلامي و قسوة ذكرياتي ..

ما تصدقش الي كتبتو .. موش أنا الي نطلب حب حد ..

ما تحبنيش خاطر حبك مشروع حنين .. و أنا نكره اني نحن .. ما تحبنيش ..