لِلـــرّاجِــل اٍلــلي بش نحِــــبّو -

بُـــون..

اليــوم جيت بش نحكي برشا حكايات..

و نلم برشا أفريات عشتهم في مديدة و شوية أيامات..

بش نحكي عليك بشويا حبار في 5وريقات ..

الأجوندا متاعي فارغة كان من أساطيري عليك و الخرافات..

نحكي شنوا حاسة ؟ و الا شنوة حسّيت..

الأيامات هاذم الكل قداش بكيت.!

قداش قريت في العينين و قداش تمنيت.. ؟

كان ترا قداش مت من مرة و قداش حييت..

تحب نحكيلك شنوا اللي خلاني هكا! خلاني تهدّيت.. ؛

عييت.. تعبت و فدّيت.. !

كلاماتهم حبستلي مخي و قلت مخي كبير و تعديت و طفيت..

تناسيت أما عمري ما نسيت*

شبيها وحدها هاذيكا ديما"هكا عليا بصوابعهم يتغامزو..

سؤال معقدني و مخليني لوحدتي قربت.. هربت و حنيت -

من أصحابي اللي كانوا صحابي، تطعنت و تشليت..

أما توا ؟

توا غمضت عينيا عالدنيا.. نتخيل فيك و اتكيت..

نتفكر أيامات كان العين تشعل فيهم بالفرحة فتيلة .. أيامات السرحة الطويلة و التبسيمة المزيانة علا الشفتين..

اما ايامات بعدهم العين ما غفات..

ايامات بعد ماهاك الفتيلة طفات

بعد ماهاك الطفلة تكوات..

ترمات و تنسات!

انتي اللي نكتب ليك.. ميسالش تجيني،؟

نستنا فيك.. نتمناك و نحلم بيك.. عايش فيا و عايشة فيك ؟

من أيام الصغرة نحلم بيك ..!

تعرف شنية نحب فيك ؟ عروق يديك.. شعر صدرك و تحويق عينيك !!

ايجا.. راني تاعبة بلاش بيك..

نستنا فيك..

ايجا نكتبك رواية.. نحكيك حكاية.. نرسمك رسمة و نغنيك غناية.

ريت ي روحي الاطراء ؟

هاهاهاه.. نعرف روحي مالخطباء العظماء!

تجي ؟ نطير بيك للسماء.. و نغرق بيك في المحيطات و البحور و الماء..!

ايجا نكتب فيك شعر ماكتبو حد مالشعراء

ميسالش راهو لوكان نسافرو مع بعضنا لصنعاء..

نكتشفوا أكبر الأدباء و نحاربو مع بعضنا الأعداء..

تي إيجا.. ياخي فيبالك بلاش بيك نتحسب مع الأحياء ؟

صدقني كان تجي مانحكي عليك للصماء و نوصفك للعمياء.

ماكش بش تجي و تخليك مالشرفاء ؟

نكتبو حكايتنا مع بعضنا

أحلا غلطة في تاريخ الأخطاء...

شبيك ؟زعما خايف مني ؟ زعما مالجبناء!

هههه بش نقلك ايجا برشا اما ماتخافش مانيش ببغاء!

ايجا نخبيك.. نغطيك و من هالدنيا نحميك

ايجا تدفيني و ندفيك ؟ نضحكك و نبكيك..

ايجا ف حضاني ليلة و يزيني و يزيك!

و كان تحب زادة نقرالك الكلام المزيان اللي كتبتو ليك..

ههه و كان انجم نغطيك و نعريك و نعبث بوالديك

ايجا نكتب علا خديك.. ايديك و سواد عينيك

روحي فيك.. ايجا نحب الدنيا بيك

تجي تسكن في قلبي و انا في عينيك ؟

تعرف اللي قد ما نحكي مانلقاش كلام يكفيك ؟

ايجا نكتب علا كلام كبار محلاه تحكيه يواتيك..

ايجا نوصف لبسة مزيانة تلبسها تطلع عليك

نصارحك و مانخبيش عليك.. نكتب علا عمايل هبلة تعملها تزيد تحليك

شوية تنبير و ضمار متسمي عالهبلة و تفوريخ الكبار

ايجا نشبع بيك

غناية مزيانة نغنيك.. مع صوت مبحاح يزيد يواتيك

تصويرة نحطها و نتفرج عليك

ايجا تحفة و نشريك..

ايجا نمن بيك

بخرافاتك العظيمة اللي تألفها منك و فيك

نمن بالأساطير اللي تخطها بخط يديك

ايجا صوتك يزهيني و لبعيد نطير يخليني ايجا حط يدك في يديا.. عينيك خلي تخزر لعينيا

ايجا نحكي و ماتسكتنيش

ايجا نرتاحلك و ماطفينيش

ايجا وجودك يكفيني.. سهرية مزيانة تزيني

كلام عقاب الليل محلاه يزهيني ..

ايجا عليك نغني

ايجا خلي حبك في قلبك مايخلي

ايجا نحسبك فني

ايجا خليني بهواك نطير و نعلي..

فيبالك بروحك في ليالي الظلام نجمة ؟

تي لا لا في الصيف نسمة

ايجا خلي وجهي يحمار بالحشمة

ايجا علا كتفي و زنودي نرسمك وشمة..

ايجا بين اللحظة و اللحظة اعطيني شمّة

ايجا في البحر بين الخضة و الخضة اعملي لمّة..

نتخيلك .. جناين روحي! و منك و بيك نداوي جروحي..

نقلك فاش نخمم ؟

نخمم في لمعة عينيك.. التبسيمة اللي بش تظهر بين سنيك

نخمم في ضحكتك اللي بش تبقا بين العينين..

و ريحتك ؟ كيف الورد و الفل و الياسمين

نكتب عليك و نتخيل فيك و نضحك علا روحي كيفاه متعلقة بيك

و انا زح انا شي مانعرف عليك

لا اسم.. لا بلاصة و سقف ساكن فيه لا كيفاش لا منين بش تجي و وبش تطلع في حياتي و وقتاه..

و اليوم انا نكتب عليك ..

علا ضحكة مزيانة عمري ماريتها علا خديك ..

ضحكة في منامي ضحكناها..

لعبة و بين يقظتي و احلامي لعبناها..

كلمة ماتقالتش اما في خيالي قلناها..

هاهاها و علا شفايفنا ياا محلاها

توحشتك ..

توحشت حكايات ماحكيناهاش..

سوايع يا ولدي و ماكملناهاش ..

حلمة ماحلمناهاش .. و تتحقق ما تمنيناهاش

توحشت روحي اللي عندك و تعيش بيك.. فيبالك اللي الارق قتلني و عدا عليا و نتصور عليك ؟

ليالي سهرت نستنا فيك ..

توحشت بوسة الخال اللي ماريتهاش .. اللبسة اللي مالبستهاش.. ضحكات ماضحكناهاش.. دموع مابكيناهاش .. غناية سميناها غنايتنا و ماغنيناهاش.. الدنيا محلاها بيك و انتي ماتدريش

.. ليش ماتجيش ليش ؟ .. هكا. صار انتي ماتحبنيش نعيش..

انتي زادة راهو خلقك ربي من طين.. ايجا نحيلك علا فلسطين .. قضيتي لولا قبل ما انتي تبدا تطل علا دفتري الاسود الحزين.. .. و انا كالمحبوسة قعدت بين تعبتين .. كايني مسجونة

ماللمساجين

قاعدة نحارب عليكم الاثنين..

تي خليك اصلي مالاصليين .. ايجا نشدو ثنيا وحدة مكملين .. اقسم بالله محتلة حتا انا بيك و مغلوبة .. و من قلبي و روحي و عقلي مسلوبة..

ايجا نحبك بلاش حدود.. و نسميو بنتنا وجود .

و كان تعمل مزية تهديلي برشا ورود..

و ميسالش راهو كان تكتبلي مرسالك .. تحكيلي فيه علا دارك .. و حالك

و الله عايشة فوضى داخلية

موش بش نخرج منها كان ما انتي تجي والا تحس بيا.. معاك انتي .!كان انتي .. الحمير الاحمر ناقص تبلبيزاتك .. و الكحل الاكحل ناقص رسماتك .. الفرحة ماتنبع مالقلب كان ببسماتك ..و

الغنايات ما نحس بتخميرتها كان باصواتك .. الكتيبة مانحس بقيمتها كان بقراياتك. حروفي في وحشتك تحاول ترويك و قد ماتشرب ماتسقيك.. و معاك الخوف موش موجود .. منـــفِي و رامينو

ورا الحدود .. و معاك الدنيا زينة.. ريحة بنينة.. أفوح مالياسمينة اللي بش نغرسوها مع بعضنا في هاك الجنينة .. و معاك العيشة اللي خطوطها موش مفهومة.. لا تعرفها منين بـــدات و لا

منين وقفـــت و وفــات..

رجعت نهلــــوس بيــكــ.. و اليوم الكــلام من عروقي هَــــابط حبار .. عروقي انا اماني ..

ايجا فديت راني مالوحِـــدة و انا هــاني نستنا فيك و كي تجي جـــاي .. جيبلي وردة .. حَـــمـــرا