اي و امبعد

.. قريت و بأحلامك عليت و استنيت و انت كل يوم تضعف و تقول تو تتعدى .. هي بلادي الي كبرت فيها و كبرتني و حلمت فيها وبيها و هي حقرتني ..عشت فيها أحلى سنين عمري و ضاعت و ضعت فيها ،  و انت تتمنى و غصتك تكبر و تكبر ..

أي و امبعد ؟؟

شنوة تستنى مني أنا لحبيتك و بكلمتي دافعت عليك و بدمعتي ناديتك..لكن انت تخليت،  و وحدي خليتني و  امشيت..لا شفعتلي لا محبة لا دموع ..و حتى الشهايد ذليت.. تمنيت نخدمك بعيني و نسهر ليالي نبنيك ، لكن انت بعدت و خليتها..

الطفلة الي كبرت بمحبتك و على حب العلم ..نسيتها؟!..

أي و امبعد ؟؟

لوقتاش يا بلادي باش نستنى تعبرني و لوعدك ليا تحقق و نحس بلهوتك بيا  و صدقك؟

ولادك عايشين فيك و الروح باهتة و حزينة و الي فد  و وضع  لحياتو حد و إلي كان للحوت وليمة .. و الي هايم لا أوراق لا خدمة.. وانت لا حنيت  علينا و لا وقفت معانا و لا  عبرتينا.. و بالرغم من هذا الكل يا بلادي  تقعد محبتك فينا باقية و تتمدد ..أما  بالله قلي أي و امبعد ؟؟

سميحة بوعزيزي