آخر رسالة ليك

و نعرف و متأكدة كيما متأكدة من اسمي

انك مش باش تقراها ولا نهار

و نعرف اللي كلامي ليك

عندو تو سنين

ماللي ولى ماشي مع الريح

خاطر نعرفو مش قاعد يوصلك

و نعرفك مش باش يجي نهار و تراه..

لتو ما نعرفكش شكون

و مزلت مش باش نعرفك شكون

حسيت روحي حابة نكتب عليك ك مجهول

و هاني شديت نكتب عليك

تو ليا سنين

يمكن يجي نهار، و نكون فيه بجنبك

نقرالك في هالكتيبة مني ليك، و تضحك على كلامي و نتغشش و تضحكني بالدموع

كيما قتلك، مازلت منعرفكش شكون، عالأقل تو..

يمكن نتلاقى بيك بعد سنين من تو، يمكن نكونو أصحاب تو، و تقلي بعد فترة اللي انتي عاشق فيا و تحبني من أول نهار عرفتني فيه، ولا يمكن آني نعملها، ما نعرفش..

يمكن نعمل حادث و تنقذ حياتي، يمكن تكون طبيب، طيار، رسام.. كاتب، ما نعرفش عليك الحق، و ما يهمنيش قد ما يهمني كيفاه باش نتلاقو،.. يمكن في الشارع، ولا في قهوة تشوفني قاعدة فيها مع حد مش طايقتو و نحسب في الدقايق وقتاه نروح، يمكن نتلاقاو في مكتبة، في مدينة ملاهي، يمكن دموعي تبل خدودك تحت الماء و انتي تعوم قريب مني في البحر اللي بحذا دارنا، و لو مش حابة برشا انك تكون من نفس ولايتي، منعرفش علاش، اما تو نتلاقاو، تو، و لا بعد أشهرة، ولا بعد سنين، ولا بالك نتلاقاو بعد ما نفقد كل أمل قعدلي في جنس الرجال، و زادة يا عزيزي، يمكن ما نتلاقاوشي جملة، و اذا ما كتبش ربي و تلاقينا بالكل، هاذي اهم حاجة، هذا اهم كلام لازم نقولهولك و لازمك تعرفو :

أول حاجة اللي اني مستاحشتك برشا، قد الدنيا الكل، و لو ما نعرفكشي، أما هالقلب اللي ساكن فيا، نهار و طولو و هو يلوج عليك، قالب عليك الدنيا و انت تقول عليك عصفور نادر في هالدنيا الكبيرة، و اللي ظاهر فيا مش باش يجي نهار و نلقاه..

يمكن يجي نهار و نتلاقاو، و نتعرفو على بعضنا، و تعرفني، تعرفني بالحق و كيما يلزم، تعرفني مالقريب و تكتشف فيا تفاصيلي الكلها، الكبيرة و الصغيرة، البسيطة و التافهة، لين توصل لروحي..

و لو مش موافقة ياسر فكرة عرس و كذا اما هاذي عاداتنا و لازم باش يجي نهار و تكون راجلي، يمكن بعد قصة حب كبيرة، ولا بعد علاقة طويلة تمثل صبرنا و تحملنا لأي حاجة ولا عبد ينجم يوقف نهار في طريقنا..

باش يجي نهار، و نسكنو مبعضنا فرد دار ،تصدق؟ هاك الجملة "باش يغطينا سقف واحد، لآخر العمر" اش نكرهها، تقول حبس باش يحبس الزوز اللي باش يعيشو مبعضهم لين ربي يهز متاعو..

اما احنا موش باش نكونو هكا، انتي باش تكون غير، خاطرك انتي اللي باش تكون بيتي، و داري ،ممنة بالحاجة هاذي و متأكدة انك باش تحبني بكل قلبك و اني باش نسكن فيك اللي قعد من روحي و نحبك بيها قد ما نقدر و أكثر..

باش نكون ليك كل شي، باش تتعدى الأيامات، و باش تتعمق فيا، و باش تتعود طبيعتي، باش تعجبك روحي الطيبة، و باش يقلقك اللي اني مزاجية، فيسع ما نتغشش، و فيسع ما نرجع نرضى، باش يعجبك فيا اللي اني نسمعك بالباهي، نحب التطيب، نحب النظافة، أما يمكن تجيني أيامات، وين لا نحب نغسل ماعون، لا انظف شي، وقتها يجيو في راسك..

بالطبيعة ماكش باش تتوقع مني باش نخدم لداخل و لبرا زادة، تنظيف الدار علينا الاثنين و باش نتشاركوه، خاطرني باش نخدم زادة، كيفك، و في خدمة نحبها و خدمة باش نختارها آني، ما نتعبش فيها و نخدمها أحلى على قلبي مالعسل،. و الشي هذا باش ينقص عليك نوبات الغش اللي ساعات ممكن تجيني كي نتقلق من حاجة ولا حد، و معاد نهز ايدي لراسي، اكيد تو تستانس، أيامات باش تلقاني عاقلة راكحة. و ايامات أخرى باش نقوملك حرب في الدار، غير خاطر حرقت الفطور مش بالعاني، ولا جربت طيبت حاجة جديدة و ما نجحتشي، اش نكره كي ما تنجحش الماكلة اللي نجرب نطيبها أول مرة،..

باش تكره فيا عنادي، نعمل كان اللي اني مقتنعة بيه،و مادامني مقتنعة بيه صدقني ما نضر حد،.

باش تحب فيا لهوتي بيك، خاطرني مش باش نسمعك وقت ما تحب برك، باش نكونلك الناس الكل كي بكلهم يتخلاو عليك، باش نحتويك، باش نعنقك، نبوسك، نعدي صوابعي في خصلات شعرك كيما تحب، و اك الخدود، و اك اللحية اللي باش نحبها، تي باش نعشقها أصل، و مبعد ندغدغك لين تضحك بالدموع،. و راسك ما فماش شكون يحب الضحك قدي، و ما فماش وحدة ضحاكة قدي، غير تعديت بحاجات تخليني نسكت، و نغزر و ما عاد نرد الفعل على شي، لذا ماذابيك تكون ضحاك، باش تضحكني، خاطر كانك ضحاك، باش نموت عليك و نعشقك قد الدنيا، يكفي انك تتبسملي باش الدنيا كلها تضحكلي..

نحبك برشا، و باش نعاودها كل ما نحس اللي انتي مستحق تسمعها مني، هالكلمة اش كبولها سعدها، باش نقولهالك بكلي بما فيا، ب عينيا اللي مش باش تغزر لغيرك، بيديا اللي مش باش تسيب يديك، مهما توصل الدنيا تعكس بيك و مهما قلقك كلامهم..خليهم يقولوا اللي يحبوا، هوما هكاك،. ما عندهم وين يوصلوا، هاي.. تهزني؟

هزني لدنيتنا نعيشوا فيها وحدنا..

اني و انتي كهو، هاي نصنعو فرش، نرقدو فيه جنب ل جنب، نسمع فيه شخيرك و نضحك عليك بالقوي، و نقومك و وتغشش، و نراضيك ببوسة مرصوصة.. نحبك برشا تأكد، أيست من اللي الحب موجود أصلا، لدرجة اني مستعدة نعطي كل ما عندي أول ما نلقاه، غير انت أقنعني انو موجود برك، موش جرد حكايات تتحكى للصغار قبل النوم.. و على ذكر الصغار، منعرفش علاش، اما نحسهم يحبوني أكثر ماللي آني نحبهم، و ما نعرفش علاش عينيا تدمع كل ما نتفرج في اشهار فيه صغيرات، يمكن خاطر وصلت أيست من اني نلقى شكون باش نحبو و نجيب منو صغارنا و نربيوهم و نعلموهم و نعديولهم حبنا.. أما نوعدك باش نكون أم هايلة، باش نعمل اللي عليا و أكثر، اما راك باش تقعد ولدي الأول و الاخير، من غير ما تغير من اول صغير لينا يعني، بالعكس هو ثمرة حبنا اللي باش يكبر بيناتنا.. اي، اني حنينة لهاك الدرجة، غير نحبك تحبني و تعاملني بالمثل و كهو.. نحبك زادة تعرف اللي آني نحب والديا برشا..و اخوتي أكثر،يعني ما تحرمنيش شوفتهم مادامت عيني حية، و ليك المثل بالطبيعة.. نسيت باش نقلك زادة إني نكره نلبس الطالونات، ما نجمش نمشي فيهم جملة، اما أكيد باش نتعلم على خاطرك كي نجيو نقابلو أصحابنا و نخرجو مبعضنا في سهرياتنا.. اعرف زادة اللي اني نحب شعري برشا، ما تلزنيش باش نقصو خاطرني نحبو طويل، كي يولي طولو يقلقني تو نقصو وحدي وحدي.. فما زادة ليالي باش تباتهم قاعد معايا، ليالي اللي باش نكون فيهم مريضة، نكره كي نمرض و نولي معاش نجم مالفرش نقوم..باش تلقاني ديما نحكي وقت نبدى مريضة..نهزك معايا سنين لتالي، نحكيلك على صغري، و نحكي نحكي لين نرقد بين يديك، خليك بجنبي و ما تسيبنيش لين نعاود نقوم، و انتي كون متأكد اللي آني باش نتلهى بيك زادة،. كل ما تحتاجني. باش نكون ليك، كل ما تحب و كيما تحب، باش نكون معاك على طول، باش نسميك داري، و باش نسكن فيك و نسكنك فيا، غير خليك معايا و نوعدك نسعدك و ما نتخلاش عليك.. يمكن كملت كلامي.. ألقاني فيسع و برا، خاطرني ياسر محتاجتلك، و منعرفش علاش، أما حاسة انك محتاجني زادة.. ميسالش نلقاو بعضنا فيسع؟ نشوفك قريب..
نحبك.

سيدة جعفر