نحطك عندي و نحكيلك لحكاية نفس لحكاية كيما عمرها ما تحكات زوز في رواية حبو بعضهم و بكاو و تعذبو و النهاية عاشو في قصر و جابو بنين و بنات ...  الحق لي كتب عمرو ما حب ولا تجذب ولي كتب فهم لي الحب عندو سبب و ماشي في بالو لي خاتم الركبة و نص لازمو يكون ذهب ولي مخور و شم و روى الرواية نشحها من أحلى مافاها و زينها بكحل عمااها ، ولي يغيضك لي قراها ستحلاها كي غلة بسمها كي فلة و الأقزام و حبت أمير و ما حبت قزم كي اللذة في شراب أحمر رخيص و إنت تسمع في الزمم.. 

حبهم كومارسيال مذرح مضروب طافي ردم ...  شكون حكاها قبلي صحيحة و حكى عالطفلة المليحة لي ذابت بين يديه و داخت و تغزلت بعينبه و حبت عطرو و عرقو و ريحة رجلتو و سموريتو و حبتو بهمو و الميزيريا لي متعدية في دمو حست روحها أول مرة تعيش في حضانو و النفس خذاتو من فمو و حبت القابلة لي بشرت بيه حبت التراب لي يمشي عليه تصوروهااا حبت أمو؟! 

 

هالكتاب لي حكاو ماحكاوش لي سي وخينا حبها على هوشها و دروشتها على حاجتها ليه في محنتها يلكمتها عندو يخباها و يتخبا باها و يرجع صغير بين يداها ...  يتخبا مالدنيا مالعالم مالعايلة لي طاللبين منو يكون راجل ياكل الصطاكة و يبقى صنديد و يجي عند هالفرخة و يذوب كالحديد يحب هاك اللحظة لي ياخذ فيها نفس و يعاود من جديد و محلاه كي يسخن الحديد و يدهم بالجليد ... 

المفيد ماهدالها ذهب و لا حوالي بطبيعتو زوالي وأحوالو لتالي و هي ماطلبت كان راجل و هو ماطلب كان مرى و العيلتين طلبو ذهب و وطية و عاصي و سهرية و طلبوها تكون مالبلدية و طلبوه يكون عندو الزين و المال و زيد شوية و تخباو و مافهمو حل لهالمصيبة شنية نحنا نعيشو بالمحبة و نفارعو البلية وحدنا و مع بعضنا نشڨو في الشوك و البك ثنية و نتقوى بيك و تتقوى بيا و تفارع و تجيب لڨمة نظيفة ناكلوها سوية و نصونلك قدرك و شرفك و ترفع راسك بيا و بخيرة الذرية أحلامنا مانكتبوها على حجر ينجم يتغدر و يتحصحص و يعملو بيه ثنية تعفسو لمة جملية ..  و ما نكتبوها على نجمة تطيح ولا على مطرة تشيح و دز على رومنسية ... 

إسمي وإسمك نكتبوه على مصحف ونايا نحلف و إنت تحلف و بيك نتلحف و مانخلي نهااار بيك و ماتخلاها بيا مش ڨلت تعشق والديا ؟ مش ڨلت نموت عليك و على خاطرك و موش مزية ...  عينيا لي ألوانها رومتك شفايف زينتها و ذابت بلي علاها و تطبعتلك و شعر لعبلك بطقس ڨلبك و يدين تشابكت بيك عمرها ما سيبتك و في تعنيڨة كبست علاهم و مخارجي سبتك ...  نايا الطفلة لي حبتك و عشقتك و غمضت عيناها عالناس بعد ما عبدت ربي و عبدتك ...  و نايا هاكالجنة لي ليك .. 

كابس كاسح و نطرى فيديك كالصلصال تشكلني تكعبرني تضعفني و تدورني ناايا لدعيت ربي بحسن الخاتمة و لڨيتك و لڨيت روحي و لڤيت كمالتي ولي جاي من عمري ليك ...  شبي لي بيناتنا كبير قوي و صعيب ماريت كيفو حكايات و لا حجايات ولا روايات كالحلمة لي ڨاعدة تتحلم و ماوفاتش كي كلام مزال ڨاعد يتحكى كي كتيبة مزالت تكتبنا و ماتقراتش