Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

يا قلبي يا غارق

Coeur rebelle

Wala Baya - ولاء بية

قلبي معبي تقولش كاس و فاض،تقولش بير و تعبى ،تقولش واد و هزوا الطوفان،لا خلى لا شجر و لا حجر ، لا ميت و لا حي ،كلوا هزوا معاه،قال شنوا ماعادش ينجم...اش ما عادش ينجم؟ تي هو طول عمرو فايض،طول عمرو طوفان،و طول عمرو مغرقني معاه،توّا ولات جديدة الحكاية؟ ملّا ريق!!!

عادي،ككل مرة ،تي هو سامحني من وقتاش ماهوش فايض؟ و لّا وقتاش ركح و شدّ ببّوشتو؟ ديما متكولف و مرمدني في جرايلو...زايد!!!ما يترباش!! و عمرو ماهو بش يتربّى! كي الفرخ الصغير،كلّ شيّ يحب يمسو و كل لعبة يحبّ يلعب بيها، و كلّ درجيحة يحبّ يجرّبها،و كي نقولّو لا أخطانا، لعب مشوم!


مرّة يذبّلّي عويناتو و يتيتملي ،و مرّة يقولّي ملّا مسكرة و معقّدة ، نهز حاجب و نحط لاخر، و نقول برّه نتبّع السارق لباب الدار،تي طفل صغير ما نجمش نكسرلو خاطرو...أمّا مبعد..كيف يضربوه أندادو،و يدزوه من فوق الدرجيحة و نزيد أنا نعطيه ما كتبلو، و نزيد نقولو "ريت كي قتلك إستكفى بروحك و أخطاك!! ريت كي ما تسمعش كلامي..."و هات من هاك الديسك المجروح ،الّي نبدى محضرتّو ماللول و اللّي عمري ما نفد منو
.
..نلقى روحي وحدي أنا و الغشير الصغير ،وحدنا في الليل ، في الظلمة،في حلمة ،و إلّا في منامة تقلبت كابوس... و الدم ينزف و الدموع عل الخدّ سايلة... و أنا يا ويلي نسكتو ونكفكفلو دموعو ؛يا ويلي نصيح عليه فمّاشي ما يرجعلو عقلو... آما زايد
فدّيت و اتهدّيت..السيناريو عارفتو بش يتعاود و العصفورة ديما بش ترجعلي مكسورة الجنحين...و أنا نداوي...يا قلبي يا مسكين...و قدّاش بش ندوملك؟...


ولاء بية

Combat coeur-cerveau

 يا قلبي يا غارق