نجم نفرح؟ نجم في ليلة معتمة نتوسد ورد خديك ونفرح، نجم كيف يغيب لقمر وتدحس الدنيا نضوي بنور عينيك ونفرح؟ نجم في غفلة من وجيعة الدنيا ننسى همك وفي جناين محبتك نزهر نواري ؟

قلي, نجم نضحك؟ وفي وسط غبينتي بيك ندفن تعذيبي ، نرسم على شفايفي المذبالة تبسيمة من الغريبة تضحك؟ نجم ننسى مرة أخبار اليوم، وهموم اليوم، والشمس إلي ممكن تضيع ثنيتها وسط الغيوم ,وتنسى من حيرتي وحيرتها تغرب ولا تشرق؟

نجم نحرق دفاتري وكتباتي وكوم الجرايد الفايحة بريحة الدمومات تعترتق،ونحل في بلاصتهم أجندة عينيك ، نتصفحها ورقة ورقة , وبغصة الكتيبة الحروف في حلقي تشرق؟

نجم نحلك أبواب قلبي ونتعرى قدامك من غير ما نخاف ؟

بيطلع عبالي أرجع أنا وياك ... غنات فيروز وطلع الصوت مبحوح من رديون مماتي الأنتيكة... نفضت غبار الدنيا على عينيا وغبرت مع الغناية، تورطت ، غرقت، فاض عليا الموج وغمتني كلمات الغناية... لقفت راسي بين إيديا ، خفت مالمواجع المتحيرة لا يثقل ويطيح من فوق كتافي...

دارت بيا الغناية دورتين في السماء، هزتني ونفضتني الحكايات ، عملت تدوليشة في تصاورك ، في ضحكتك، في حضنك، في دفاك، في غشك وجفاك ... كاينو البارح في الإيام وإنت في محبتي سارح،

Wala Baya - ولاء بية

قالولي لشكون تكتب؟ إلي عاشقة فيه ما يعرفش يقرا، ما يشوفش الحروف، ما يسمعش في صوتك! قالولي زايد كلامك وهدر حبار أقلامك!

قلتلهم الكلمة سكاكن ، لو كان تحبس في القلب وما تخرجش تتقلب على مولاها، وتذبحو!

قالولي حتى كان هو بعمرو ما حس بكلامك؟

قلتلهم عمري ما كنت نكتب ليه، نكتب لروحي!

تتعدى عليا أيمات قلبي فيه برشة كلام يحب يخرج، مخي يدور في بلاصتو، يجبد فيا امين ويسار...برشة حكايات تحب تقال، وأنا إلي متعودة نطوع الحروف في ريشتي يهرب عليا الكلام ونولي ورقة بيضة...الكلام يهرب من قلمي وأنا في السراب نحوم نقررق بكلمة وإلى كلمتين يجيوني ، نزين بهم الصفحة البيضاء ألي تغزرلي بعين الشماتة عندها أيمات ...

ولا الكلام جاء ولا الصفحة تملات ، والأيمات باقي متعدية في طريقها ما تستنى حد... وأنا ماني نموت عالعناد، كل يوم نفيق نجبد نفس الورقة البيضاء ، ونفس الريشة القديمة ، ونقعد نتعلق في غيمتي نستنى الوحي يهبط علي ويجيني ... وهو عامل علي بالعاني، وبعدو عليا خلاني نعاني...

Wala Baya - ولاء بية

إيجى نحكيلك شنية عمل فيا بعدك عليا ، إيجى نحكيلك من نهارت إلي إنت مشيت شنية صاير فيا ، قهوتي مراررت وضحكي صفارت، والخريف طيشلي أوراقي بنفخة ريح فالثنية... إيجى نحكيلك كيفاش الوقت ولا يدور عكس المنغالة، والسوايع تتعدى وانا سارحة فالسقوفات المنسية،

معادش فارق معايا لا ليل ولا نهار، لكلها أيامات تتعدى ونتي بعيد على عينيا، لا كلام يضحك ولا صوتك يضوي عليا ضلام السهرية ، برد في عز الصيفية، منين تحبني نجيب شميسة تضوي عليا ، تي حتى هي زادت على الهم إلي بيا...