‎كلّمتوا قتّلوا نحب نشوفك قالي خارج مع صاحبي محسن ، أيً أما أنا نحب نفرغ طاقتيّ ، نحب نتكلّم ، نبكيّ ، نضحك ، نصيّح نطيّح ، ِنتّطلاطخ ، نحلم ونعيّط،نحب نغنيّ منحبش شكون فرحتيّ يسرقها منيّ ، نحب نطيّر ، نجنح ومن قوتيّ الناس تحيّر ، نحب شكون يهديّليّ نوار ويعطينيّ كلمات نطيّر بيهم بين الأطيار ، ويشوفونيّ الزُيارْ منحبش نتذكر أحزانيّ ونقول تتفكر هاك النهار   .

‎المدة لخرانيّة منيش قد بعضيّ ، حاس روحي فاد وموش عاجبنيّ شيئ ، وهو كي تجي تشوف ملي تخلقت منيش قد بعضيّ ، نحس العالم مهوش محتوينيّ ، كينيّ لابس سَبـاط ضيّق عليّا وكل يوم يزيّد يضيّاق .وممكن في حياتي لكل فرحت فرحة برك هي كي نجحت في بكالوريا آداب ، بعد معاناة طويلة من العذاب والتحضيّر والتمحريّث ، في لخر نجيب معدل حقيّر ،ناخذ بيه شعبة محقورة مجتمعيّا ومتخدمش ، خاطر سياسة دولتنا العزيزة متخدمناش نحنا أصحاب الشهائد العليا ،

تخدم ولد سي فلان وعلان ،وإلي عندو أكثر، باكو هذاك هو إليّ يخدم  ، أما إلي يكلت على سعدو الراقد ، يمحّرث يمجور ويمستر، وياخذ كتوراه متخدموش دولتنا، حقا حقا مفماش فلوس ، الفلوس تتوجد وقت تتصب الشهاري، ووقت تتعطى الهيبات ،والمنح ،والزيّادات، وعطيّان القروضات، أما باش تخدم ولادها متتوجدش ، دَايُوغْ حتى كيّ خذيت شهادة الدكتوراه في الأدب العربي بملاحظة مشرف جدا، مفرحتش خاطر عارف روحي باش نتمرمد بعد مناخذ الشهادة ، خاطر الواقع في تونس خايب وما أخيب من الدنيا كان ناسها ، إليّ يبدى مستوى سنة ثالثة" د" يتحكم فيك كيّ تمشيّ تشوف خدمة ، ويبدى يعيّط ويخرج في العقد متاعو ، والقيّح الفكريّ ، وهو إسمو على القُلّة ميعرفش يكتبوا ولحقيقة ديما نقول نحن "أمة ضحكت من جهلها الأمم" يرحم فم إليّ ڨالها .

‎تونس مزيانة وبحرها يهبل ، نسمتها حنينة ، وتراثها وتاريخها عريق ، وماكلتها بنيّنة وزينها زين سلاطين وجبولاتها ومغراتها غارقين ، أما الزين وحدو ميكفيش، هذاك علاه هي زين يقتل الطموح ولا يطيّب فيها 
‎العيش ، خاطر سياسة حكومتنا ومجتمعنا عاملين مسابقة شكون يُمصْ أكثر من عرق الزوالي التونسي إلي لا عندوا لا والي ولا تالي ، إلي موش ولد البُسطاجي والفرملي، والمُحامي، و ولد الزميل ،ميعيشش في تونس ياكلوا الشر والجوع والتهميّش والخصاصة ، في تونس الشهايد معندها متعمل ، يا تعمل علاقات وتولي معرفة وعندك باكو تحتك يا بلاش بيها القراية ، أكهو البقاء للي ِّيّلحس أكثر .
‎وهو بيناتنا إليّ بُرجو بالمرمة ميموت كان في سطل بغليّ ، أنا إليّ ضحيّت، وقمت الفجاري وتشعبطط في الميروات ورسكيّت في الكيران، وتخبيّت من الكنترول ، وتحملت الجوع ،والشر ، والتعب ،وصڨع الدنيا وبروديّة العايلة نلقى روحي دكتور بطال .
‎
‎أيهم الدين الزڨروتي دكتور الأدب العربي ،نسكن في بلاصة يقولوا عليها بلاصة أمازيّغيّة مزيانة تكرونة شيرات سوسة ، أمي جابتني أنا الكبيّر وأنا الراجل الوحيد وسط سبعة بنات ، أيّ نعم بابا  سبعة !  ربتنيّ كيما تقول هي أحسن تربية ، وكلتنيّ، شربتنيّ، قراتنيّ ، تعبت علينا، وسكنتنا في قلعة مزيانة وسط بلاصة ريّفية داير بيها الحجر هاكليّ يقولوا تراث  ،  بلاصتنا شمسها تهبل ، وسماها صافية ، ونعاجها وحيواناتها يتصايحُوا . خواتي البنات لا هوما حملونيّ ولا أنا حملتهم من صغرتهم يحبوا كان يلعبوا وحدهم ، يلعبوا التنڨُو ،والكاريّ ، والغوميضة  و سبعة كعيبات ، ويُمشطوا للعرايس شعوراتهم ويمكيجوا ويحفلوا ويزيّنوا ، وكي كبروا ولاو يحكو على ولد خالتك ساسيّة المزيان وحَرجوا إليّ في الأكحل، ولحيتوا المحصورة وزين حوايجوا ، ويحكو على بنت خميسة الدجالة إلي زعما تشوف وتقرى في الكف وتضرب الخفيف وتكركب وتشوف الرمل، هاكليّ يقوليّ عليها رمالة  للسواح الي كانوا يجو يتفرجوا في تونس، وزينها ،ويروجوا للسياحة في تونس ، وفي هذا لكل وزاراءنا الأفاضل يتنابحوا مفماش فلوس ، قال شنوا تونس بلد نامي فقير وهو كان نعيشوا مع بعضنا بالحاجات البسيطة الي عندنا نكونوا اغنى دول العالم ، أما حتى أنا قدانيّش نعفس في حلاب مقعور،  السرقة والتهبة والترافيّك والتحيّل لشكون يخلوه..عاد ڨتلكم خواتيّ البنات  منلقى منحكي معاهم ، وحتى كيف نتدخل يقولولي " أوووووه خلينى بنات صافين " خاصة كي يجوا سيرين ونرمين بنات عزالدين جارنا ، يلعبوا مع بعضهم ، أما أنا ندخل لبيتي ، هو كي تجي تشوف معندي مع شكون نحكي ولا نلعب ولا نتزلع في ماتش كورة ، ولا نتدمم خاطر  نتعارك مع ولد الجيران ، كنا نسكنوا وحدنا سورنا طويل ، وبيتنا مفيهاش دخول وخروج برشة ، كنت ديما راقد مكبوب ناكل في القُوت ونستنى في المُوت ، خاطر بابا مفهمتش شخصيتوا تحسوا ناقم والإ كيفاه ، لا حس بيّا ، ولا لزني لصدروا ، ولا طبطب على أكتافي، كنت وحدي شبه ميت ، أنا ميت بالحياة ، الشمس تزرق وتغيب وأنا لا حياة لمن تُنادي  ، هوكا كي تجي العودة المدرسية نرجع نقرى نتفرهد شويّة خاطر نرجع نقرى على الأقل إنسي روحي شويه ، أما نتعب خاطر أنا ضعيف في اللغات الفرنسيّة، والإنڨليزيّة، ستي يسرى متاع الأنڨلي عندها عصا كبيرة تضرب بيها كي نغلط، وبزهري الأحرف ديما أنا إلي نغلط تاكلنيّ بالضرب لين تصّطكت في الإنڨليزيّة ومعادش نحبوا ، هو حتى سيدي مراد متاع الفرنسيّة كيف كيف ، وبطبيعة الحال مهمش باش يقرونيّ إيتيد خاطر بابا إلي يخدم بيهم يسكر بيهم ، وأمي عليها كل شيئ هاني نفهم شويه إجتماعيّات ومدنيةو تفكير إسلاميّ ومتميز في العربيّة ، عشقي كان في الرواية والقلم ، فأنا إبن القلم، والكتاب، والروايات، والخربشات...