Emna Frawes - آمنة فراوس

معادش فها رجوع و الي باش يصير خلي يصير...وقف ....رجع النفس مرة و ثنين و ثلاثه ...واقف قدام البلاص....كين يحسب في دقات قلب...كينو يستنى في خبر ...ميعرفش شنوا نتيجة...ولا نهاية...كل شي قدام...مضبب...اما مستحيل يتراجع...اليوم الي حج حج و الي عوق عوق هكه ام كانت تقل بعد كل اخر امتحان...

عاود الخزر للوقت...التسعه و نصف...الشتاء ماشيه و تقوى... الحومة بدات تخنس...في العاده...حومتها رايضة....مش جديده علاها ...دخل من الباب البلاص...شعل ضو الدروج... عاود وقف. خرج بكو النوار...من الصاشي الكحله...نضم روحو شويه...مسح صبات بpapier mouchoirs...تنهد...خزر على جناب...هز عينيه الفوق ...اش باش يطلعل ل troisième ...

و هو في ه الحالة سقيه تكركر فيه...طلع درجه درجه على راحة راحة...يتمتم هو بيدي ما يعرفش شقاعد يقول...كل شويه يقف يرد النفس...و يعاود يخزر للوقت... وصل لدارها...
حس روحو كين تشل...يديه منجمش يهزها و يضرب النقوز...

رجع يتمتم...

اول ماتحل الباب إنقز علاها نعنقها بقوة...نبوسها...(توحشت بوستها)...منخليهاش تقول حتى كلمة...نقلها طول سامحني...نعمل لقطه كي متع المسلسلات المكسيكيه...

نركع على نص ركبه و نقلها حبيبتي...كنت ميت و توا حييت كي شفت عينيك...نقلها رجعلي حياتي...

وقتلي هو سارح في البداية يسمع في خطوات على الدروج...يزرب يهز يد و يدق الباب دقه خفيفه...و يعاود ضربه اخرى متبعدش علاها في القوة...

تعدى وليد في العشرين بجنب

سلم عليه ...خزر نص خزر و تعدى...

رد السلام...بحشمه و خوف كين عامل عمله...

يديه تقطر بالعرق...عاود دق الباب اقوى شي  جواب بهت...متصورش ميلقهاش يعرفها نهارتنهارتحد مفماش...بنسبه لها لاحد مقدس تبقى فيه مع روحها بين اجواءها  تصنعها على كيفها ...ترقد...ادوش...

تحضر لبستها...تسمع موزيكا...تشطح...تفرج في افلام قديمة...مسلسل...تقرى كتاب ...تشرب كويس ...قهوة عربي...متعمل شي...تعمل الي يضهرلها بنسبه لها ه النهار يومها الخاص...لها وحدها...تعيش كيما تراه...متصورش تخرج فيه...

عاود دق الباب...مرة وراء مرة شيلا حس و لاخبر....

توتور على لخر ...اول عاده غيرتها بعد فراقهم...يستنها و ما يمشيش حتى تجي...واقف على بابها...خلي نعرف وقتاش  تجي و ين مشات ....

جى على جنب دارها...فرش صاشي ع دروج و قعد يستنى.