التّفاؤل و مشتاقاتو

femme enthousiaste

Asma Sakhri Gharsi - أسماء الصّخري الغرسي

 

نعرف الدّنيا تعبت إبن آدم ملّي تخلق فيها... نعرف موش لعبة باش توصل و تاخذ بلاصة فيها

 

نعرف النّاس إلّي فيها كان تلقى تنحّيلك الخبزة من فمك... نعرف تعبك و شقاك ما يكفيش كان ما تزيدش تدعيلك أمك

 

لكن نعرف زادة كلمة قالها رسولنا الكريم: "تفائلو بالخير تجدوه"... بالله كلامو موش صحيح كان ما نتفايلوش بيه الخير منين باش نجيبوه

 

 

كان ما تسعالوش كيفاش باش تكمل حياتك تسير... عمركش سمعت بواحد تعثر و هو قاعد


قوم تحرّك تعثّر بالحق و بالك تتّعثر في حاجة باهية تبدّلك حياتك أحسن ملّي تعديها راقد

 

الإنسان المتفائل ماهوش مثالي... ماهوش خارج على الواقع لكن  عمرو ما يخطو خطوة لتالي...

 

ديما كاس الأمل في يدّو... يشرب منو كيف يعطشو الإحباط و اليأس يشدّو...

 

تبسّم كيف تقوم في الصباح... حتى و كان وحدك تهنّى ماكش مهبول معاك ملايكتك كيف تشوف تبسيمتك ترتاح...

 

إغسل وجهك و أخرج أسعى... و بإلي مسكّرة تفكّر إلي ما يداوي اللّسعة إلا اللّسعة...

 

أضحك في وجه الناس يولِّيو يحبوك... هكّا قالو من قبل بابا و بوك...

 

هز بذرة التّفاؤل لوسط البلاد... إيجا تحت تمثال فرحات حشاد في التراب و وسط العباد...

 

أزرعها و تلهى بيها و إستنّى حصادها... تكبرلك في بلاصتها شجرة إسمها أمل و الثقة و النجاح يكونولك ثمارها...

 

ما تاكلهمش وحدك فرّق على أحبابك...  خلّي يتفايلو و يفرحو و ينوب عليهم ربي كيما ربي نابْلِك...

 

كان سماك نهار تعبّات بالغيوم... غمّض عينيك تاو تشوف تحتهم النجوم...

 

و كان أرضك نهار تعبّات بالثلوج ...غمّض جفونك تاو تلقى تحتها خضار المروج...

 

راهو كثرة الوقت الفارغ و قلّة الحركة... ما عندهم باش يفيدوك كان تنقيص البركة...

 

أملى حياتك بالعبادات و العبادة ماهيش كان الصّلاوات... أقرى كتاب، رتّل القرآن، صوّر مع ولدك، طيّب حلويّات...

 

ربِّي كانالو تربح فيه أجر... و بصوتو و تزقزيقو يزهى نهارك مالفجر...

 

عمرك ما توحل و تغص في كلمة ما نجّمش... قول أنا نجّم، أنا نعمل، أنا ما نسلّمش...

 

حتّى و كان فشلت أنفض عليك التراب و بربش في ماضيك أكيد راك قبل نجحت... و غدوة زادة عندك بارشا نجاحات ... في قرايتك، في خدمتك، في دارك مع صغارك، في الشارع مع صحابك، في أفاريّات الحياة...

 

يزّيك من كلمة فدّيت... يزّيك من التنهيد، يزّيك ما قلت أحّيت...

 

أخلق مالفدّة جو... من قبل تقالت ها الكلمة موش من تو...

 

تكون واقف أقعد... تكون قاعد أرقد...

 

أربح نومة تشوف فيها أحلام حلوة... و إن شاء الله كيما ربي عطاك القوة في الحلمة يعطيك القوة و يرزقك في واقعك توا... عهد الرّثاء وفى مع الخنساء... توا أحنا في عهد الثورات، عهد فيه كان التخطيط للمستقبل مافيشي العياء...

 

ماكش نكرة و إلا صفر علي اليسار... إنت بمحبّة أمك و بوك نوّارة الدّار...

 

الكلهم محتاجينك: إديك و ساقيك و فمك و حتى من عينيك ... دارك و حومتك و جيرانك و تونس كلها تجري في حضانك... بركة تبسملهم و ورّيهم صف اللّولي... و بدّل پيلتك مالسّالب للموجب و قول لعجلة مخّك هيا دوري :) ...

 

فكّر و خطّط... أكيد عندك لمستقبلك و مستقبل بلادك أحسن مخطّط...

 

عيش كل لحظة و إستمتع لآخر نفس فيها... إحسبها آخر لحظة في حياتك باش تعيش فيها...

 

قوي إيمانك بربّي و بروحك و بقدراتك... كافح و عارك على أفكارك و دافع على تخطيطات حياتك...

 

خالط الكبارات... موش معناها إلي عندهم الملاين مخبيّة في البانكات...

 

نقصد إلّي تبسيمتهم ما تفارقهمش... و إلي كلمة لا ما توقّفهمش...

 

و إلي بلّي يفشلو ما يسلّموش... و إلّي كيف يشوفوك عندك فكرة تحب تعملها طريقك ما يقطعوش...

 

عامل كل واحد كيّنو أهم شخص عرفتو... أكيد تاو تعرف بارشا ناس كل واحد يعاملك كيما إنت عاملتو...

 

و إلي تحسّو ناغر منك و يحبط فيك... خليه في محطتو و خوذ ترانِك و قولو بالسلامة و بارك الله فيك...

 

إشري ساشي شكلاطة و إلاّ حلوى... و كل ما يعرضك صغير أعطيه كعبة تاو تشوف قدّاش يفرح و يحس بالسّلوى...

 

جرّب و من أغلاطك تعلّم... ما فمّاش حتّى واحد تولد من كرش أمّو يمشي و يتكلّم...

 

إحفر في وسطك أكيد تاو تلقى... بارشا فرحة و أمل متخبّي يستنّى منّك في الزّلقة...

 

خرّجهم ما تخافش ما يوفاوش... الحاجات هاذم يتشارجاو وحّدهم موش كيما الحزن و البكاء و هات من هاك التناوش... الحاصل قلبي عليك معبّي يا كبّي... ملّي قرّرت باش نتفايل بالخير ماعادش تغلبني...

 

و أنتوما زعما قرّرتو كيفي باش تتفايلو بالخير... باش تبّعوه هو و مشتاقاتو و إلاّ باش تخليّوه يبعد و يطير كيف الطّير

...

 

 

أسماء الصّخري الغرسي


التّفاؤل و مشتاقاتو